O estudantado das tres universidades públicas de Galicia e os seus sete campus poderá participar nun cribado para detectar a Covid-19, segundo anunciou este xoves a Consellería de Sanidade. Para isto, a Xunta enviará 50.000 tests rápidos (sobre os que por agora non se deron detalles das súas características) para previr a posible transmisión da pandemia.
A información difundida pola Xunta detalla tamén o número de tests que se enviarán a cada campus para o cribado. Serán 16.834 para Santiago, 11.649 para A Coruña, 8.646 para Vigo, 3.967 para Ourense, 3.502 para Pontevedra, 3.039 para Lugo e 1.945 para Ferrol.
Sanidade insiste en que, “así como os colexios e escolas son contornas seguras, a contorna académica das universidades tamén o é”. Porén, o Sergas mantén “unha vixilancia específica” nas cidades dos sete campus, “xa que estas contornas universitarias caracterízanse por estar constituídas por persoas novas, nas que a probabilidade de ser asintomáticas é alta o que dificulta as actividades de detección precoz”.
Nas últimas semanas, algunhas institucións xa avanzaron nesta estratexia de prevención. É o caso da Universidade de Vigo, onde xa desenvolveron máis de 2.300 probas PCR entre o seu persoal a través do cribado co sistema pooling con especial atención ao campus de Ourense deseñado polo Chuvi, e que permite analizar agrupamentos de mostras para axilizar o seu procesamento. Nas vindeiras semanas as probas estenderase ao alumnado, pola elevada incidencia do coronavirus na cidade.
Neste mesmo sentido, apunta a Consellería, os e as estudantes son, en xeral, “persoas cunha gran frecuencia de interaccións sociais o que multiplica as posibilidades de transmisión”, o que “xunto cunha menor percepción do risco, constitúen factores que poden derivar no empeoramento da situación epidemiolóxica“.
Sanidade prevé que a incidencia da Covid-19 sexa aínda maior nos vindeiros meses
Responsabilidade
Diante do empeoramento das cifras da pandemia, e ante a incerteza das vindeiras semanas e meses, Sanidade “fai un chamamento para concienciar e responsabilizar a este colectivo, para que nas súas actividades privadas manteñan todas as medidas de seguridade, reduzan as súas interaccións sociais, evitando reunións con persoas non conviventes, festas nos pisos, aglomeracións, etc”.
Conclúe a Consellería que “deben facelo pola súa saúde, pola saúde das súas familias e doutras persoas de máis idade ás que poden transmitir unha enfermidade que pode ser grave nelas e pola sociedade en xeral, xa que o empeoramento da situación epidemiolóxica levará indefectiblemente a un incremento das restricións vixentes para preservar a saúde dos cidadáns”.
