O III Premio Honorífico á Excelencia na Traxectoria Científica, co que se recoñece a carreira de científicos que contribuíron á xeración de coñecemento e avances na súa especialidade e concedido pola Fundación AstraZeneca recaeu en María José Alonso, catedrática do Departamento de Farmacia e Tecnoloxía Farmacéutica da USC. O galardón premia a súa traxectoria como investigadora no ámbito da biofarmacia. Alonso lidera dende hai máis de trinta anos un grupo de investigación pioneiro en España no ámbito da nanomedicina e nos sistemas de liberación de fármacos e vacinas. A profesora da USC recibiu a contía de 5.000 euros para doar á institución española e proxecto de investigación que ela elixa.
Traxectoria
María José Alonso, investigadora no Centro de Investigación en Medicina Molecular e Enfermidades Crónicas (CiMUS), é catedrática de Biofarmacéutica e Tecnoloxía Farmacéutica na USC, onde entre os anos 2006 a 2010 foi Vicerreitora de Investigación e Innovación. Traballou como científica visitante na Universidade de Paris XI, (1986-87), na Universidade de Angers, Francia (1989) e no MIT, Estados Unidos, durante 1991-1992 e en 2012.
O seu laboratorio ten tres décadas de experiencia na formulación de macromoléculas, é dicir, péptidos, proteínas, antíxenos, anticorpos monoclonais e polinucleótidos, utilizando sistemas de administración baseados en polímeros, alén de ser pioneira en numerosos descubrimentos no campo da nanotecnoloxía farmacéutica e a nanomedicina. María J. Alonso coordinou varios consorcios de investigación financiados pola OMS, a Fundación Gates e a Comisión Europea. É a autora máis citada en España na área de Farmacia e Farmacoloxía e estivo entre os TOP TEN en Farmacoloxía (clasificación internacional Times Higher Education, 2010) (Índice H 96). Recentemente, pasou a formar parte da Power List dos investigadores máis influentes no campo da Biofarmacia (The Medicine Maker, 2020).
A profesora Alonso é, asemade, inventora de 22 familias de patentes, a maioría delas con licenza para a industria e é parte de dúas start-up. Traballou na Controlled Release Society (CRS), a sociedade científica líder a nivel mundial na área da liberación controlada de fármacos e a nanomedicina, durante quince anos; e foi presidenta da da mesma entre 2017 e 2019. Tamén é editora en xefe de Drug Delivery and Translational Research, unha revista oficial da CRS, alén de formar parte do consello editorial de doce revistas científicas.
Recibiu 36 premios, entre eles a Medalla á Excelencia en Investigación e Educación outorgada polo Goberno de España, o Premio Jaime I, a Medalla Castelao que concede a Xunta de Galicia, e outros premios outorgados por organismos e fundacións científicas. É membro do College of Fellows do American Institute for Medical and Biological Engineering (AIMBE) e Fellow da Controlled Release Society, membro de dúas academias en Galicia, a Real Academia de Farmacia de España (RANF), membro da Real Academia de Medicina de Bélxica e tamén membro da Academia Nacional de Medicina de EE. UU. (NAM). Recentemente, María José Alonso ingresou na Academia Nacional de Medicina de Bélxica.
