A aceleradora BFAuto (Business Factory Auto), promovida pola Xunta a través da Axencia Galega de Innovación (GAIN) o Instituto Galego de Promoción Económica (Igape) xunto ao Cluster de Empresas de Automoción de Galicia (CEAGA), Stellantis, o Consorcio Zona Franca de Vigo e a sociedade de capital risco Vigo Activo, foi un factor decisivo para a posta en marcha de Hermes Smart Control, unha start-up viguesa que durante a súa curta existencia (naceu no 2018) xa foi quen de desenvolver e comercializar produtos innovadores con solucións para a monitorización de maquinaria e mellora da loxística nas empresas, especialmente no sector do automóbil.
Xabier Barra, un dos socios fundadores da empresa, explica que a pandemia da Covid-19 fixo máis difícil o camiño de consolidación da empresa pero aos poucos van avanzando cos produtos que están a desenvolver. O principal deles é o Whimcom (Where is My Container) unha solución enfocada para a loxística do sector do automóbil e que permite coñecer en todo momento a localización e o estado dos contedores.
“É unha solución que ten un impacto moi importante para os clientes. Temos finalizada a fase de desenvolvemento do proxecto e agora estamos a iniciar a proba piloto. Agardamos tamén que o sector poida recuperarse pouco a pouco da crise vivida e que poidamos comercializar o produto con varios clientes que están xa moi interesados”, indica Barra.
A solución desenvolvida por Hermes baséase na implantación dun chip no contedor que permite en todo momento coñecer a súa localización. O sistema utiliza a xeolocalización con coordenadas GPS sobre redes comerciais, o que fai que a súa cobertura poda ser mundial e os custes sexan moi baixos. A duración da batería é outro dos elementos resoltos por Whimcom, o que a converte nunha solución de plataforma aberta, robusta e adaptable a cada cliente. “É un produto que mistura hardware e software e conta ademais cunha plataforma na nube, o que fai que o cliente non teña que instalar unha aplicación”, sinala Barra.
Outro dos produtos que xa está a comercializar a start-up viguesa é o Qair, un medidor de CO2 de gran calidade que pode usarse tanto en áreas públicas e privadas coma restauración, vivendas, oficinas ou bibliotecas. O dispositivo desenvolveuse durante a pandemia da Covid-19 xusto nun momento no que este tipo de produtos comezaron a ter unha demanda moi elevada.
Mobocen é outra das solucións desenvolvidas por Hermes e neste caso trátase dun dispositivo que permite controlar o funcionamento da maquinaria. Permite monitorizar as vibracións e a temperatura das máquinas, de xeito que os clientes poden anticipar fallos nos diversos elementos dos aparatos. Con isto conséguese evitar fallos non previstos e reducir os custos de parada de liña, así como planificar mellor o mantemento da maquinaria.
OPORTO MELLOR CA MADRID
Barra sinala que a empresa actualmente se atopa nas instalacións do viveiro de empresas de Zona Franca de Vigo de Porto de Molle e tanto a aceleradora BFAuto como CEAGA seguen a prestar unha importante colaboración en diversos aspectos do seu desenvolvemento, como é a formación e tamén a captación de clientes.
A internacionalización é un proceso natural para Hermes, xa que a proximidade a Portugal fai que sexa un mercado natural para a empresa. “Polo de agora non nos plantexamos ir máis ala porque estamos a traballar cos círculos de proximidade e Oporto está moito máis preto que Madrid para nós”, apunta Barra.
Cara ao futuro, Barra sinala que a monitorización vai ser unha actividade moi importante e a súa empresa traballa nun sector que é o primeiro paso antes de poñer en marcha a intelixencia artificial. “Os datos son fundamentais para avanzar neste tipo de procesos e nós somos como as abellas que constrúen o panal para que despois alguén poda sacar o mel de aí”, indica o directivo de Hermes.
