As obras do parque eólico Ruña II, que están a desenvolverse nos montes da Ruña, concello de Mazaricos, poden estar a causar danos sobre o patrimonio natural, particularmente sobre hábitats prioritarios e singulares elementos xeomorfolóxicos froito do glaciarismo non contemplados na Declaración de Impacto Ambiental (DIA). Así de contundente é Adega, a Asociación para a Defensa Ecolóxica de Galicia, sobre o parque promovido pola empresa Eurus Desarrollos Renovables no concello coruñés.
Segundo a asociación, a ampliación da pista de acceso aos muíños do proxecto podería danar unha zona con matogueira higrófila e turbeiras, un tipo de ecosistema húmido moi característico en Galicia e protexido na actualidade. A rexión en cuestión atópase arredor do nacemento e a canle do Rego da Ribeiratorta: “Dáse a circunstancia de que estes impactos non foron completados na Declaración de Impacto Ambiental”, explican.
Nun ámbito xeográfico máis amplo, explican dende AGEDA, as obras deste parque eólico —explanacións, pistas e gabias— tamén afectaron elementos xeomorfolóxicos moi singulares, vencellados ao antigo glaciar rochoso da Ruña.
Unha contorna especial e vulnerable
O glaciar rochoso da Ruña é único en toda a costa galega, tal e como destacan dende a Asociación: “A súa entidade debería ser preservada, xa que constitúe unha formación xeolóxica de máis de 100.000 anos e ten un excepciional interese científico para a xeoloxía de Galicia”.
Para evitar un maior impacto, ADEGA solicitou á Dirección Xeral de Patrimonio Natural a paralización das obras de Ruña II. O principal obxectivo din, “é que se inicie un procedemento para a declaración deste espazo como protexido, ben como unha ampliación da Zona de Especial Conservación Carnota – Monte Pindo, ou ben como un Monumento Natural ou Paisaxe Protexida”.
A zona atópase comprometida ademais pola estación de bombeo do río Xallas, que na actualidade soporta a actividade de ata catro encoros: Fervenza, Santa Uxía, Castrelo e Ponte Olveira. Recentemente, dúas empresas presentaron dous proxectos de novas centrais de bombeo no río, cuxos depósitos atoparanse sobre o monte da Ruña.
