O experto José Luis González Cespón aborda no texto de que maneiras nos pode afectar o ruído durante o día e a noite.
O experto José Luis González Cespón aborda no texto de que maneiras nos pode afectar o ruído durante o día e a noite.

Como nos afecta o ruído?

O investigador da UVigo José Luis González Cespón, especialista en acústica, analiza neste artigo os impactos do son no noso organismo

* Un artigo de

Constantemente preguntámonos sobre como nos afecta e ata que punto nos pode alterar o ruído. O primeiro que temos que ter claro é que é o ruído, e definirémolo como aqueles sons que interfiren na actividade humana diaria: o estudo, o traballo, a comunicación, o descanso, etc.

Para falar de como nos afecta o ruído nun ambiente normal de convivencia (o que facemos de forma cotiá) falaremos por separado do día e da noite.

Durante o día atopámonos cunha serie de sons que entendemos como ruído cando non podemos comunicarnos con outras persoas, ben porque non nos oen ou ben porque non os oímos nós. Acontece falando, no ambiente laboral, cando estudamos (ver PDF) ou cando non podemos prestar atención a calquera actividade que esteamos a realizar.

O ruído máis molesto: alto e intermitente

Os sons que normalmente nos molestan máis son o que teñen un nivel alto, superior a 80 dBA, e son intermitentes. Son estes prexudiciais para a saúde auditiva? A resposta é que se temos unha exposición temporal moderada, non, é dicir, non o son se os oímos un intre durante o día e ao longo da semana, de cando en vez.

A medida de canto é prexudicial obsérvase na lexislación laboral, na que se establece que un traballador exposto a un son cun nivel inferior ou igual a 80 dBA durante unha xornada laboral de oito horas non ten risco de perda de audición.

Nas cidades, en termos xerais, os niveis de exposición son inferiores. Respecto a outros efectos nocivos, a Organización Mundial da Saúde detectou que as principais molestias debidas ao ruído (ver PDF) prodúcense sobre todo nas aglomeracións, eixos viarios e aeroportos.

Nas nosas casas temos varios tipos de sons, os externos –que poden vir da rúa ou dos nosos veciños– e os propios –que son os que menos nos molestan–.

Cando percibimos os primeiros en niveis que case coinciden co exterior significa que temos un mal illamento acústico dos nosos peches (e, por tanto, tamén térmico). O ruído adoita coarse por xuntas, sobre todo polas xanelas que teñen un mal peche, e polas caixas de persianas. A solución está en mellorar a estanquidade das xanelas, ou ben engadir unha dobre xanela. En canto ás caixas de persianas, existen tratamentos realizados por empresas do sector que permiten insonorizarlas.

Que ocorre co ruído durante a noite?

Pola noite percibímolo máis porque se eliminou parte do ruído de fondo que existe durante o día e é entón cando empezamos a oír os sons que antes non se escoitaban e que se fan evidentes. O nivel sonoro recomendado pola OMS é de 30 dBA (ver PDF) nos dormitorios, que é o equivalente á ausencia de ruído –cando non hai, o nivel sitúase entre os 25 e 30 dBA–. Entón os sons teñen un compoñente psicolóxico de molestia porque se fan máis evidentes.

Se o son se produce dentro da nosa vivenda, localízase a fonte que o produce e normalmente resólvese. Con todo, se o ruído procede do exterior, ben dun veciño ou ben da rúa, a forma de proceder é diferente.

As cidades ou as comunidades autónomas dispoñen de ordenanzas que regulan o nivel sonoro nocturno producido, tanto na rúa, como o que chega ao interior da nosa vivenda.

Dentro da nosa casa

O nivel permitido no interior das casas producido por un son exterior non pode superar os 25 a 30 dBA nos dormitorios, e así o recollen a maior parte das ordenanzas das cidades de España. Se houbese un nivel superior causado, por exemplo, por un veciño, o máis recomendable é facerllo saber, xa que moitas veces o oído humano non é consciente do que un ruído pode molestar a outra persoa. En calquera caso, a Policía Municipal sempre pode axudar tendo en conta a lexislación de cada municipio.

Como se desprende do comentado no parágrafo anterior, os niveis de ruído son máis ben baixos, inferiores a 50 dBA na maioría dos casos, polo que non teñen o nivel acústico necesario producir patoloxías auditivas. Con todo o efecto que produce sobre a perturbación do sono é o que realmente prexudica á saúde e onde ven os seus efectos adversos.

O nivel sonoro das cidades durante o día e a exposición temporal á que habitualmente nos atopamos sometidos non afectan á perda de oído alén do que é a presbiacusia (perda auditiva debido á idade).

E durante a noite, o problema que se pode dar polo ruído non afecta tampouco á capacidade auditiva, pero si trae consigo trastornos do sono. Con todo, sempre estaremos máis expostos se vivimos nunha cidade con grandes aglomeracións, eixos viarios, ferroviarios ou aeroportos.


* José Luis González Cespón é profesor titular de Deseño na Enxeñaría da Universidade de Vigo e especialista en Acústica Aplicada.

Cláusula de divulgación: o autor non recibe salario, nin exerce labores de consultoría, nin posúe accións, nin recibe financiamento de ningunha compañía ou organización que poida obter beneficio deste artigo, e declara carecer de vínculos relevantes alén do cargo académico citado.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.