Escáner do fetus in fetu atopado no abdome da paciente, recollido por BMJ.

Unha moza vai ao médico e descóbrenlle un xemelgo parasito

O British Medical Journal publica o caso desta nena de 15 anos que tiña un vulto no estómago que resultou ser un 'fetus in fetu'

A prestixiosa revista British Medical Journal publica un caso médico abraiante no seu último número. Unha masa que crecía no abdome dunha nena de 17 anos en Patna, na India, era tan grande que enchía e distorsionaba toda a súa cavidade abdominal. Pero non se trataba dun tumor, porque os médicos descubriron que contiña dentes, cabelo, ósos, graxa e cartilaxe. Era un xemelgo parasito, un caso máis habitual do que se pensa, no que o que tiña que ser un irmán non chega a medrar definitivamente e continúa no corpo despois do nacemento.

Hai un tipo de tumor que pode incluír este tipo de tecido, chamado teratoma . Pero isto non era un teratoma. Semellaba algo moito máis raro: era o propio xemelgo da nena, absorto mentres ambos estaban aínda no útero.

Este tipo de afección é denominada fetus in fetu (FIF), e xeralmente non se ve en persoas maiores de 15 anos. Segundo o informe do caso, a paciente buscou atención médica, xa que durante nos últimos cinco anos notara algo medrando no seu abdome. Ás veces causáballe dor; outras, cando comía, sentíase saciada moi rápido.

Fetus in fetu localizado no tórax. Fonte: Wikimedia.

No exame, os médicos atoparon unha masa grande e dura, de forma irregular. “Unha tomografía computarizada (CECT) con contraste abdominal amosou unha masa ben definida que medía aproximadamente 25 por 23 por 15 centímetros, que se estendía desde o epigastrio (xusto por riba do estómago) ata a pelvis superior”, escribiron no seu informe de caso .

“Amosaba áreas de densidade de graxa, tecido brando e múltiples compoñentes de densidade calcificada de varios tamaños e formas que se asemellan á forma de vértebras, costelas e ósos longos. Esta masa estaba a causar o desprazamento e a compresión das vísceras abdominais adxacentes”, continuaba a diagnose.

A presenza de graxa, vértebras e costelas levou aos médicos a diagnosticar á paciente adolescente con FIF. Así que programaron unha cirurxía para extraer a masa. Efectivamente, o que os médicos retiraron do abdome da nena parecía ser un humano parcialmente formado.

O equipo describiu unha masa feita de “material peludo, múltiples dentes e estruturas que se asemellan ás xemas das extremidades”, que inclúe graxa, cartilaxe e óso, así como tecido neural, intestinal e da pel.

A diagnose pode confundirse cun tipo de tumor denominado teratoma

En realidade non se sabe como se desenvolve o FIF. A teoría do xemelgo parasito, na que un xemelgo dun par fetal idéntico é absorbido polo outro, é unha das máis aceptadas.

Crese que o estraño fenómeno acontece en só 1 de cada 500.000 nacementos vivos, e a masa parasitaria xeralmente non sobrevive por moito tempo. Outra é que pode ser unha forma particularmente ben desenvolta de teratoma, que pode ser a forma en que acontece en pacientes maiores.

Anteriormente, só se notificaron outros sete casos de FIF en pacientes maiores de 15 anos. A cirurxía foi un éxito, coa maior parte da masa eliminada. Con todo, algo tiveron que deixar atrás: adheriuse demasiado preto dos vasos sanguíneos do tracto gastrointestinal, e a súa extracción podería ocasionar unha perda de sangue significativa.

A paciente está ben, pero terá que regresar para recoñecementos anuais para asegurarse de que o tecido restante non se volveu canceroso. “Estaba moi preocupada polo meu vulto abdominal, despois da operación síntome moi ben e o meu abdome agora está plano e os meus pais tamén están moi contentos”, manifestou a moza: “Grazas a todos os médicos que me operaron”.

Aquí podes consultar o informe publicado polo BMJ na súa sección Case Reports

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.