A revista Current Biology publicou este luns un artigo dos investigadores Jeff Podos (Universidade de Massachusetts Amherst) e Mario Cohn-Haft, do Instituto Nacional de Pesquisas da Amazônia, que describe o que ata agora é o trilo dun paxaro máis forte xamais documentado na literatura. O campaneiro branco (Procnias albus), da familia dos cotínxidos, pode emitir un son de ata 125,4 decibelios, moi por riba dos 85 que adoitan ser considerados como seguros para o oído humano.
Os científicos realizaron un traballo de campo para rexistrar os sons do Lipaugus vociferans, outra especie que, como o seu nome indica, tamén se caracteriza polo forte son que emite, e que estaba ata agora considerada como o paxaro co trilo máis intenso. Porén, o campaneiro superouno.
“Mentres estabamos observando aos campaneiros, tivemos a sorte de ver ás femias unirse aos machos nas súas zonas de trilo”, explica Jeff Podos. Engade o investigador a Science Alert que “nestes casos, os machos cantan as súas cancións máis ruidosas e xíranse durante o trilo para facer soar as notas finais directamente cara as femias”. Podos apunta: “Gustaríanos saber por que as femias se manteñen tan preto dos machos durante este trilo; é posible que estén intentando estudalos de preto, aínda a risco de sufrir danos no sistema auditivo”.
Os campaneiros brancos pesan arredor de 250 gramos, pero posúen músculos potentes na súa zona abdominal que probablemente contribúen á potencia do seu canto. En comparación cos 125 db deste paxaro, cómpre subliñar que nunha oficina silenciosa hai uns 40 db, o timbre pode soar a uns 80 db, a bucina dun coche está arredor dos 110 db e un taladro neumático, sobre os 120 db.
Referencia: Extremely loud mating songs at close range in white bellbirds (Publicado en Current Biology).
