A nova técnica podería mellorar a terapia xénica en moitas doenzas. Fonte: Juan Gaertner/SPL.

Unha revolucionaria técnica consegue reducir os erros na edición xenética

Científicos de Harvard describen unha ferramenta chamada "prime edition", que permite un maior control dos cambios de ADN

A revista Nature publica este luns un traballo moi relevante encabezado por David Liu, bioquímico do Broad Institute do MIT e Harvard, no que se describe unha nova ferramenta de edición do ADN, coa que se poderían mellorar as terapias na loita futura contra doenzas de orixe xenética.

Este método, chamado prime edition (que se podería traducir como edición principal, ou edición de calidade) mellora as posibilidades de que os científicos poidan actuar só cos fragmentos que desexan, en vez de desencadear unha serie de cambios sobre os que non terían control. Esta nova técnica podería mellorar unha das ferramentas de edición máis coñecidas, a CRISPR-Cas9, xa que ao non controlala totalmente, pode xerar novos erros e efectos non desexados. Pero a alternativa do equipo de Harvard ofrece un maior control.

Alén disto, a ferramenta tamén parece capaz de desenvolver unha variedade maior de edicións, o que algún día podería permitir que sexa usada para tratar as moitas enfermidades xenéticas que ata agora non teñen cura. David Liu estima, segundo recolle Nature, que a súa técnica podería axudar aos investigadores a abordar case o 90% das máis de 75.000 variantes de ADN asociadas a enfermidades.

“Son os primeiros pasos, pero os resultados parecen fantásticos”, expuxo a Nature Brittany Adamson, científica especializada na reparación do ADN e edición xenética na Universidade de Princeton. En declaracións a El País, o xenetista Lluís Montoliu, do Centro Nacional de Biotecnología, subliña que a técnica é “elegante e fascinante”, unha “proposta disruptiva, algo novo, que non existía e que obrigará a revisar as posibilidades terapéuticas derivadas da edición xenética”.

Con todo, a técnica atópase nunha fase inicial, e segundo expoñen os propios autores no seu artigo, “precísase moita máis investigación nunha ampla variedade de tipos celulares e organismos para entender mellor a prime edition e perfeccionala”. A propia revista aclara que a versión publicada agora do traballo é un manuscrito aceptado para publicación, pero que deberá ser revisado antes da súa versión definitiva.

Funcionamento da técnica

Tanto CRISPR-Cas9 como a prime edition funcionan cortando o ADN nun punto específico ddo xenoma. CRISPR-Cas9 rompe as dúas cadeas da dobre hélice do ADN e logo aproveita o sistema de reparación da célula para arranxar o dano. O problema é que esta acción pode insertar ou eliminar letras de ADN nos puntos onde se cortou o xenoma.

Porén, a prime edition evita estes problemas: aínda que utiliza a técnica Cas9 para recoñecer secuencias de ADN específicas, a encima Cas9 é modificada neste caso para cortar unha soa cadea do ADN. Despois, outra encima chamada transcriptasa inversa, guiada por una cadea de ARN, realiza as edicións no punto do corte, como se pode ver neste gráfico.

Referencia: Search-and-replace genome editing without double-strand breaks or donor DNA (Publicado en Nature).

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.