Un estudo de medio millón de persoas suxire que beber café diminúe o risco de morte prematura por calquera enfermidade. Os científicos indican que consumir tres cuncas desta bebida cada día reduce a mortalidade precoz un 18% en homes e un 8% en mulleres. Os efectos beneficiosos obsérvanse xa sexa o café con cafeína ou descafeinado, afirman os expertos.
O café é unha das bebidas máis consumidas, aproximadamente cada día bébense 2.250 cuncas ao redor o mundo. Un novo estudo, publicado hoxe na revista Annals of Internal Medicine, asocia o seu consumo cun menor risco de morte.
Os resultados do traballo, desenvolvido por científicos da Axencia Internacional de Investigación sobre o Cancro (IARC) e o Imperial College de London, revelan que beber tres cafés ou máis ao día “independentemente se é con cafeína ou descafeinado” reduce o risco de morte prematura un 18% en homes e un 8% en mulleres.
Mediante datos do estudo EPIC (European Prospective Investigation into Cancer and Nutrition), o equipo de investigadores analizou o consumo de café de 521.300 persoas que superaban os 35 anos de idade, en 10 países da UE. No estudo, os expertos tamén tiveron en conta factores como a dieta ou o tabaquismo.
“Consumir café de xeito moderado podería ser beneficioso para a saúde”
“Descubrimos que beber máis café está asociado cun menor risco de morrer por calquera enfermidade, sobre todo por afeccións circulatorias e dixestivas”, explica Marc Gunter, autor principal e xefe do grupo de Epidemiologia Nutricional do IARC. O científico resalta que, a pesar de que cada país ten diferentes hábitos e costumes á hora de beber café, os resultados foron similares en todas as nacións europeas.
A mesma revista faise eco doutro estudo (realizado durante 19 anos e no que participaron 185.855 americanos de diversas etnias) que mostra como o consumo de café reduce o risco de mortalidade en persoas que non son brancas.
Elio Riboli, profesor e director da Escola de Saúde Pública do Imperial College, sinala que os descubrimentos europeos “súmanse a un conxunto de evidencias crecentes, que indican que beber café non só é seguro, senón que tamén podería ter un efecto positivo na saúde das persoas”, e engade, “aínda que é necesario levar a cabo máis investigacións, podemos estar seguros de que estes resultados confirman os descubrimentos previos ao redor do mundo”.
Segundo o grupo de científicos, o seguinte paso será pescudar cal dos compoñentes do café é o que outorga efectos beneficiosos para a saúde. Ademais, apostan por outras liñas de investigación que analicen o efecto do consumo do café vinculado a resultados médicos.
“Debido ás limitacións da investigación observacional non podemos recomendar ás persoas beber máis ou menos café. Dito isto, os nosos resultados suxiren que consumir café de forma moderada -unha taza ao día- non é prexudicial para a saúde, e que incorporalo na dieta podería ser beneficioso”, conclúe Gunter.
