O sorprendente fenómeno dos barcos voadores

Cres que esta imaxe é real? A primeira vista, semella unha montaxe feita con Photoshop. Pero esta sorprendente foto foi tomada en Escocia mentres se celebraba o Open de Golf que retransmitía para todo o mundo SkySports.

E logo os barcos de agora poden voar? Non é así. Pero este fenómeno de buques que semellan despegar sobre as ondas ten unha explicación: trátase dun espellismo. En concreto, é unha ilusión óptica que se produce como consecuencia da refracción da luz, é dicir, o cambio de direccións que experimenta unha onda durante o seu percorrido cando cambia de material.

Publicidade

Unha masa cálida pasa por encima dunha fría en contacto coa auga provocando unha densidade desigual no aire. O resultado? Os barcos voadores que parecen flotar na atmosfera.

Este efecto é ben coñecido en meteoroloxía e denomínase Fata Morgana . Recibe o seu nome da fada Morgana, en referencia ao personaxe das sagas do Rei Arturo que, segundo a lenda, era un fada cambiante.

Esta ilusión óptica débese a un cambio de temperatura. Obxectos que se atopan no horizonte como, por exemplo, illas, cantís, barcos ou témpanos de xeo, adquiren unha aparencia alongada e elevada, similar a “castelos de contos de fadas”. Os efectos Fata Morgana adoitan ser visibles pola mañá, despois dunha noite fría. É un efecto habitual en vales de alta montaña, onde o fenómeno vese acentuado pola curvatura do chan do val.

É así como nestas imaxes os buques semellan voar por riba do mar. Unha miraxe que ten a súa explicación científica.