O GPS (Global Positioning System) é unha tecnoloxía cada vez máis presente nas nosas vidas. Non só para ubicarnos a nós, senón tamén para que as grandes compañías nos ofrezan información personalizada segundo onde esteamos. Pero esta tecnoloxía, desenvolvida no seu momento polo departamento de Defensa dos Estados Unidos, podería ver alterada a súa enorme precisión debido ao movemento no polo norte magnético da Terra que están detectando os investigadores.
Este fenómeno non é novo. Desde hai tempo sábese que este punto, determinado polo lugar onde o campo magnético é perpendicular á superficie, estase a mover do norte de Canadá cara a Rusia a máis de 50 quilómetros por ano.
Para poñer solución a estas alteracións, un comité de expertos reuniuse estes días co obxectivo de lanzar unha actualización de emerxencia sobre o Modelo Mundial Magnético. Para a maioría da xente, o cambio é anecdótico, xa que estas alteracións afectan, sobre todo, ás persoas que se moven en latitudes próximas ao Ártico e nos dispositivos de altísima precisión. Pero os GPS tamén se poderían ver afectados a medio prazo.
Porén, os científicos están seguindo con interese o que acontece para comprender por que o polo norte magnético se está movendo. Segundo o xeofísico da universidade de Leeds Phil Livermore, consultado por The Washington Post, podería haber unha alteración no núcleo da Terra. O campo magnético regúlase a partir do fluxo dos materiais fundidos nesta capa do planeta, de xeito que ao longo da historia da Terra é habitual que haxa este tipo de cambios. Así, rexistráronse varias inversións dos polos magnéticos nos últimos millóns de anos.
Desde que en 1831 se realizou a primeira expedición para atopar este polo norte magnético, o punto foi cambiando. En 1940, cando o exército estadounidense decidiu medilo de novo, movérase máis de 400 quilómetros cara ao noroeste. Porén, agora está xa máis de 1.000 quilómetros daquel lugar, no medio do Ártico, a catro graos do norte xeográfico.
Cabe subliñar que os polos norte e sur magnéticos non están nas antípodas, e móvense cunha certa independencia. No sur, este punto mantense máis ou menos estable desde 1990.
Así, a investigación na que participan estes días os expertos do comité levou a adiantar a actualización do novo Modelo Magnético Mundial, que estaba prevista para 2020, debido a que a alteración xa estaba a piques de garantir unha navegación precisa en sistemas como o GPS, segundo recolleu Nature.
No Artigo orixinal no Nature non fala para nada do GPS. A verdade e que non ten que ver o GPS coa posicion do norte magnético, nin os receptores nin os satelites usan de norte magnetico para nada.