A carreira espacial que emprendeu China segue abraiando ao mundo. Despois de levar por primeira vez unha sonda, a Chang’e 4, á cara oculta da Lúa, acaba de coñecerse unha nova imaxe que amosa esta parte do satélite que non vemos desde a Terra cunha nitidez nunca percibida ata agora. E ademais, vemos o noso planeta de fondo.
A imaxe foi descargada o pasado luns polo telescopio Dwingeloo, nos Países Baixos, e emitida polo satélite LongJiang 2, que está en órbita lunar desde 2018. A foto foi tomada o domingo 3, e amosa, segundo apunta o equipo do Dwingeloo, a cara oculta da Lúa e Sudamérica na Terra, e é “probablemente a mellor que se tomou nunca”.
This photo of Earth and the Lunar farside, maybe our best ever, was taken yesterday by the Chinese Lunar satellite DSLWP-B (Longjiang-2). The Dwingeloo telescope downloaded the photo from the satellite this morning. More info at https://t.co/sKt7w9mol9 pic.twitter.com/IsnyvqekTz
— Dwingeloo Telescoop (@radiotelescoop) 4 de febrero de 2019
En outubro de 2018, o telescopio holandés xa recibira outras imaxes semellantes, pero non se vía a Lúa ao completo, xa que o LongJiang 2 estaba máis preto do satélite da Terra e non ‘collía’ na cámara. “Nos vindeiros meses agardamos recibir máis fotos”, adiantan os investigadores holandeses. O LongJiang 2 é o único satélite lunar chinés que mantén contacto coa Terra, toda vez que as autoridades deron por perdidas as comunicacións co seu ‘compañeiro’ o LongJiang 1. O aparello que tomou esta histórica foto estivo ‘apagado’ durante a alunizaxe da Chang’e 4 para non interferir nas comunicacións, pero agora está activo de novo, e enviando imaxes moi prometedoras. E pode haber máis por vir.
A cara oculta da Lúa foi retratada por primeira vez en 1959 pola sonda soviética Luna 3. Debido á sincronía na rotación da Terra e o seu satélite, nunca se nos amosa esta parte. Podes saber máis neste vídeo.