Os mercados e as pequenas tendas de proximidade contribúen á boa saúde xeral da comunidade. E axudan a previr a obesidade. Investigadores das universidades de Alcalá e Johns Hopkins compararon a contorna alimentaria de dúas cidades modelo moi afastadas: Madrid (España) e Baltimore (Estados Unidos) nun artigo publicado na revista Preventive Medicine. E que confirma os datos de estudos previos, que xa demostraran que a contorna alimentaria inflúe sobre a calidade da dieta e sobre enfermidades como a obesidade.
En Madrid, o índice de obesidade rolda o 14,3%, mentres que en Baltimore alcanza un 34%, segundo datos do departamento de Saúde da cidade estadounidense e de Atención Primaria da capital española.
As principais diferenzas respecto da alimentación están no tipo de comercios de alimentación atopados: mentres que na área de Madrid destaca a presenza de comercios tradicionais (fruterías, pescaderías… onde predominan os alimentos frescos e saudables), este é un tipo de tenda inexistente en Baltimore, onde abundan as tendas de conveniencia (tendas con horarios de apertura moi extensos e gran cantidade de comida preparada).
Ademais, en Madrid, o 63% dos comercios presentes na área de estudo tiñan á venda variedades de froitas e verduras, fronte a un 53% das tendas de Baltimore. A distribución especial destes alimentos é homoxénea na zona da capital, mentres que en Baltimore limítase á zona suroeste.
Favorecer ao peón fronte ao coche pode influír nos hábitos de alimentación
Os resultados deste estudo resaltan a importancia das tendas tradicionais e dos mercados municipais como elementos saudables nas cidades, e como posible estratexia preventiva do sobrepeso, a obesidade e outras enfermidades relacionadas cunha alimentación pouco conveniente.
As conclusións tamén amosan as diferenzas en cando á accesibilidade en ambas as cidades. En Madrid, un 77% dos residentes viven a unha distancia menor de 200 metros dunha tenda cunha alta dispoñibilidade de alimentos saudables. E o 23% restante, a entre 200 e 400 metros dun comercio desta categoría.
Con todo, en Baltimore soamente un 1% dos residentes tiñan acceso a menos de 200 metros a unha tenda cun alto índice de alimentos saudables. Un 13% dos residentes vivían a unha distancia de entre 200 e 400 metros, e a maioría dos residentes (82%) atopábase, polo menos, a unha distancia de 800 metros. Estes resultados resaltan como unha contorna urbana deseñada para favorecer ao peón fronte ao coche pode influír sobre os hábitos de alimentación, e por tanto, sobre a saúde dos residentes.
Podes ver o estudo completo
publicado na revista Preventive Medicine
