Dous investigadores do Departamento de Enxeñaría Agroforestal do Campus Terra da USC impulsan un proxecto europeo para mellorar o cultivo e a calidade do lúpulo da cervexa. Os profesores Javier Cancela e Xesús Pablo González encabezan un consorcio integrado por investigadores de Portugal, Francia, Reino Unido, Alemaña, Croacia, Eslovenia e Chequia que foi seleccionado entre os catro finalistas dun programa europeo de seguridade e sustentabilidade alimentaria.
Realizarán un estudo integral do cultivo do lúpulo e do sabor final da cervexa
A proposta que lideran Cancela e González, integrantes do Grupo de Proxectos e Planificación (Proepla) da USC, está realizada en colaboración cos principais centros de investigación do sector, e pretende acometer un estudo e análise integral dos parámetros que afectan ao cultivo do lúpulo, así como as características organolépticas da cervexa. No marco desde proxecto,denominado “Wethop”, realizaranse accións moi diversas que abranguen a monitorización de cultivos, a análise das propiedades da cervexa ou desenvolvemento de modelos sobre o efecto das regas e do abonado na calidade do produto final.
Neste último punto, o da calidade da cervexa, estarán centrados os investigadores da USC. As súas actuacións centraranse nas análises de campo e na elaboración final da cervexa. Tamén se realizarán catas orientadas a coñecer a valoración dos consumidores.
Nestes días, Cancela e González están visitando a algúns dos socios do seu proxecto para pulir detalles sobre a presentación do concurso. Todo está pendente agora de coñecer a resolución das axudas europeas que permitirán o avance do proxecto. Os investigadores da USC confían en que a súa proposta sexa seleccionada.
