A noticia percorreu como o lume moitas pantallas desde primeira hora hora deste martes. Un usuario de Instagram (@richardbarreira) denunciaba que esta rede social eliminou unha imaxe dun cocido, tamén publicada en Facebook. Achegaba outra captura de pantalla na que, segundo a súa versión, a foto incumpría as normas de comunidade, acompañando a mensaxe co argumento de que non se aceptaban “certas cousas”, como “violencia gráfica”, “linguaxe que incita ao odio, acoso e bullying”, e “espidos e actividade sexual”.
É posible, como xa aconteceu noutras ocasións, que os sistemas de control cos que a rede social monitoriza as publicacións viran algo que activara as súas alarmas nos chourizos, os anacos de polo e lacón ou o codillo que aparecen na imaxe.
Instagram pide desculpas e recupera a foto “censurada” do cocido galego
Con todo, a publicación do mesmo usuario feita en Facebook pasou os filtros e seguía dispoñible na tarde deste martes. E iso que as normas desta última rede, ao contrario que Instagram, contempla a posibilidade de eliminar contido que amose “desmembramento”, “órganos internos visibles” ou “animais carbonizados ou queimándose”.
As polémicas sobre censuras e contidos controvertidos son constantes nestas dúas redes, ao contrario que Twitter, que é moito máis permisivo na publicación destas imaxes ou vídeos. Así, os sistemas de control revisáronse despois de que no pasado Facebook censurara obras de Rubens por aparecer mulleres espidas.
Ante isto, o propio usuario incluía a posibilidade de que algunha denuncia por contido pouco apropiado levase a Instagram a eliminar a imaxe do cocido.
