O estudo da Universidade de Liverpool estudou máis de cen mil persoas no Reino Unido.

Estas son as profesións asociadas a un consumo excesivo de alcol

Un estudo masivo no Reino Unido revela grandes diferenzas entre ocupacións laborais e máis consumo asociado a cargos directivos

Os datos achegados por máis de 100.000 británicos durante catro anos permitiron atopar probas de que os profesionais de determinados oficios son máis proclives a converterse en bebedores habituais. Entre eles están os traballadores do lecer nocturno e da limpeza industrial, profesores de autoescola, escaiolistas e altas directivas.

Ten un camareiro máis risco de beber alcol sen moderación que unha dentista? Un albanel é máis propenso a ser un bebedor habitual que unha profesora? Un novo estudo publicado na revista BMC Public Health analiza se existe algunha relación entre a ocupación laboral e o consumo excesivo de alcol.

Os autores, dous investigadores da Universidade de Liverpool (Reino Unido), sinalan que atoparon diversas asociacións entre o devandito consumo excesivo e determinados traballos no país, aínda que non puideron determinar a causalidade. “O consumo excesivo de alcol aumenta o risco de dano físico e mental, e ao comprender que ocupacións están asociadas cun consumo excesivo podemos orientar mellor os recursos e as intervencións”, declara Andrew Thompson, investigador asociado no Institute of Translational Medicine e autor do estudo.

Prevalencia do consumo elevado de alcol por profesións en mulleres.

Para lograr os datos, os expertos reuniron a un total de 100.817 participantes de entre 40 e 69 anos, a través do Biobanco de Reino Unido. Desde 2006 ata 2010, os participantes tiveron que declarar periodicamente a cantidade de alcol que inxerían, expresada en unidades estandarizadas. No Reino Unido, unha unidade de alcol defínese como 10 mililitros (8 gramos) de alcol puro. Tamén, recolleron datos demográficos de cada participante.

Ao recompilar a información, estableceron dous baremos mediante os cales homes e mulleres podían estar expostos a un alto risco de dano físico e mental. O consumo excesivo de alcol definiuse como máis de 35 unidades por semana no caso das mulleres e máis de 50 no caso dos homes. Unha copa grande de vino tinto ten 3 unidades de alcol. Así que 50 unidades semanais serían uns 17 vasos de viño á semana, entre dous e tres diarios. Case unha décima parte dos participantes (17.907) excederon os baremos e foron clasificados como bebedores habituais.

Das 353 profesións contempladas neste estudo, en 77 traballos observouse unha asociación co consumo de alcol e 51 albergaban altos niveis de bebedores habituais. Os que máis, donos de pubs e xerentes de locais, profesionais de procesos de limpeza industrial e asistentes de deporte e lecer. Por contra, as ocupacións con menor proporción de bebedores foron as cregos, físicos, xeólogos e meteorólogos e médicos.

Prevalencia do consumo elevado de alcol por profesións en homes..

“Os datos compleméntanse con outros obtidos desde a década de 1890, nos que as persoas que traballan de xeito rutineiro en contacto directo co alcol, como o persoal dos bares, amosan as taxas máis altas de mortalidade relacionada con esta substancia. O mesmo obsérvase no extremo oposto da gama, onde os membros do clero […] mostraron sistematicamente baixas taxas de mortalidade relacionada. Estes resultados poñen de manifesto como a contorna ocupacional, que pode incluír crenzas sociais e relixiosas específicas, inflúe na mortalidade relacionada co alcol”, recalca o estudo.

En canto a diferenzas por sexo, as mulleres que ocupaban cargos directivos ou en inmobiliarias obtiveron as maiores prevalencias, seguidas das profesoras de autoescola e as camareiras. “No caso das mulleres, a categoría de directiva en calquera profesión amosou a maior proporción de ocupacións con prevalencias significativas para o consumo excesivo de alcol. Isto podería estar relacionado coa tensión laboral ou coas longas xornadas de traballo”, consideran os expertos no estudo. Pola súa banda, os homes que maiores prevalencias rexistraron foron os limpadores industriais, electricistas especializados en vehículos, persoal da hostalería, escaiolistas e traballadores do sector dos residuos e a reciclaxe.

“As diferenzas observadas para homes e mulleres nas asociacións entre ocupacións e consumo excesivo de alcol poderían indicar como as contornas laborais, xunto co xénero e outros factores complexos, poden influír nas relacións coa bebida”, explica o autor.

Aínda que en ambos os dous xéneros detectouse un elevado consumo de alcol entre donos de bares, esta tendencia foi máis acusada entre as mulleres. “Un dos achados máis consistentes nos nosos datos foi que as ocupacións consideradas como ‘comercio especializado’ en alcol tiñan unha alta porcentaxe de bebedores habituais”, sinala o informe.

Aínda que este estudo non atopou causalidade na relación ocupación/inxesta de alcol, os seus autores cren que pode ser de utilidade para que os responsables políticos saiban que sectores poderían ter as taxas máis altas de consumo excesivo de alcol.

“As intervencións destinadas a abordar o consumo de alcol en ocupacións onde o exceso é frecuente poderían beneficiar tanto ás persoas como á economía en xeral, ao mellorar o benestar dos empregados e aumentar indirectamente a produtividade”, conclúe Thompson.

Aquí podes consultar o artigo publicado en BMC Public Health

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.