Unha nova camiseta de baixo custo, capaz de producir electricidade pola diferenza de temperatura do corpo e da contorna foi deseñada por investigadores da Facultade de Ciencias da Universidade de Málaga (UMA). Trátase do prototipo ‘e-textile’, desenvolvido xunto ao Instituto Italiano de Tecnoloxía de Xénova (IIT), a partir de métodos sustentables e materiais de baixo custo como a pel de tomate.
“Ata o de agora, para a creación de dispositivos electrónicos os metais eran os elementos químicos máis usados. Con este proxecto damos un paso máis e, usando materiais lixeiros, máis accesibles e menos tóxicos, tamén conseguimos xerar electricidade”, explica José Alejandro Heredia, un dos autores deste traballo.
A fórmula é moi sinxela: auga, etanol, derivados da pel de tomate e nanopartículas de carbono. Unha disolución que, segundo os expertos, ao quentarse, penetra e adhírese ao algodón, conseguindo con iso propiedades eléctricas como as que xera o telurio, o xermanio ou o chumbo, pero a partir de materiais biodegradables.
“Unha persoa, cando camiña ou corre, entra en calor. Se levase posta unha camiseta deseñada con estas características, a diferenza coa temperatura máis fría do ambiente, podería producir electricidade”, afirma Susana Guzmán, outra das autoras da UMA.
Os resultados deste proxecto, no que tamén participou o investigador italiano Pietro Cataldi, foron publicados na revista Advanced Functional Materials. Actualmente este equipo de científicos continúa traballando no desenvolvemento de dispositivos que se axusten aos téxtiles e que, por exemplo, xeren luz para que a camiseta sexa reflectora ou permitan, mesmo, cargar o móbil sen necesidade de usar o cargador.
A biomedicina, grazas á monitoraxe dos sinais de cada usuario, ou a robótica, debido a que co uso destes materiais menos pesados e máis flexibles pódense mellorar as características dos robots, son outras das súas posibles aplicacións.
Camiseta “Iron Man”
“Nun estudo anterior xa fomos capaces de crear unha antena wifi a partir de pel de tomate e grafeno. Tamén estamos a estudar integrar este invento na camiseta ‘e-textile’, o que permitiría parecernos ao superheroe Iron Man, que no seu traxe leva axustados todo tipo de dispositivos tecnolóxicos podendo ata voar”, chancea Guzmán.
José Alejandro Heredia e Susana Guzmán pertencen ao Departamento de Bioloxía Molecular e Bioquímica da Universidade de Málaga. Ambos forman parte do Instituto de Hortofruticultura Subtropical e Mediterránea (IHSM) e entre as súas liñas principais de I+D+i destaca a creación de dispositivos electrónicos a partir de materiais biodegradables.
Referencia: Green Biocomposites for Thermoelectric Wearable Applications (Publicado en Advanced Functional Materials).
