Cando o pasado ano Donald Trump retirou aos Estados Unidos do acordo climático de París, deu unha razón sorprendente: o seu país abandonaba a loita contra o cambio climático “para que o mundo se deixe de rir de nós”.
“Xa non queremos que outros líderes e outros países rían de nós, e non o farán”, prometeu Trump en xuño de 2017. O argumento era bastante infantil, como xa é un clásico no líder estadounidense. E tivo un efecto inesperado: agora é o mundo o que está a rir del.
Porque unha compañía de Londres chamada EnviroBuild pagou esta semana 25.000 dólares nunha poxa para poñerlle nome a unha nova especie de anfibio recén descuberta. E observaron semellanzas entre o inquilino da Casa Branca e a criatura serpentina, que é case cega e vive enterrada. Así que dende este martes ese verme se chama “Dermophis donaldtrumpi” en recoñecemento á posición do presidente sobre o cambio climático. Tamén fixeron a montaxe fotográfica que encabeza esta reportaxe.
O anuncio produciuse pouco despois do acordo desta fin de semana dos negociadores do clima en Polonia sobre as regras para implementar o pacto de París, que Trump considera contrario aos intereses de Estados Unidos.
A empresa EnviroBuild, que se dedica á construción con materiais sustentables e ecolóxicos, quere así chamar a atención sobre as terribles consecuencias no mundo real da negativa de Trump a recoñecer unha catástrofe ambiental, que os científicos din que podería chegar xa no ano 2040.
“Ao decatarnos das similitudes entre o asombrosa pero descoñecida criatura e o líder do mundo libre, non puidemos resistirnos a comprar os dereitos en honrar ao presidente”, dixo Aidan Bell, cofundador de EnviroBuild, a The Washington Post.
A firma agregou unha mopa de cabelo louro á imaxe dun anfibio da mesma familia para completar a sátira. Nun comunicado, a empresa dixo que Dermophis donaldtrumpi é especialmente vulnerable aos efectos do cambio climático e “por tanto, está en perigo de extinguirse como resultado directo das políticas climáticas do seu homónimo”.
Os dereitos de denominación puxéronse á venda o 8 de decembro nunha “Poxa de legados de especies” patrocinada por Rainforest Trust , unha organización sen fins de lucro para a conservación con sede en Virginia que cualificou ao evento como “a maior poxa de nomes de especies da historia”.
EnviroBuild recoñeceu que a autoridade para nomear unha nova especie adoita estar reservada para os biólogos. Bell sinalou que o título tería que someterse a unha revisión por pares, de acordo coas normas que rexen a nomenclatura zoológica. Pero non é a primeira vez que se honra a persoas famosas. O ex presidente George W. Bush, o ex vicepresidente Richard B. Cheney e o ex secretario de defensa Donald H. Rumsfeld teñen nomes de escaravellos. O nome de Beyonce adorna unha mosca de cabalo. E unha ra de árbore comparte nome co príncipe Carlos de Inglaterra.
O Dermophis donaldtrumpi mide 10 centímetros, é case cego e vive baixo a terra. “Concorda totalmente co presidente Trump, que é cego ante o cambio climático e prefire agachar a cabeza no chan”, dixo a compañía nun comunicado.
The Neopalpa Donaldtrumpi is a moth and the first species to be named for #Trump: https://t.co/90Oyv4AFSu pic.twitter.com/SjsKIIFRpn
— Jeffrey Guterman (@JeffreyGuterman) 18 de enero de 2017
Pero Dermophis donaldtrumpi non está soa entre as criaturas que levan o nome de Trump. A revista ZooKeys alcumou a unha traza de pelo louro como “Neopalpa donaldtrumpi“. E no 2016, bautizaron como Trump unha nova especie de ourizos de mar fósiles atopada en Texas.
Aínda que o xornal The Washington Post faise hoxe eco desta nova especie en homenaxe a Trump, ata o de agora non hai reaccións do presidente. Seguiremos atentos ao seu Twitter. E, obviamente, tampouco sebemos que pensa de todo isto o propio becho.