Baixo determinadas condicións de iluminación, o asteroide parece unha caveira. Ilustración: José Antonio Peñas/SINC.
Baixo determinadas condicións de iluminación, o asteroide parece unha caveira. Ilustración: José Antonio Peñas/SINC.

O asteroide dos Defuntos achégase de novo á Terra

Aínda que non é un obxecto perigoso para os habitantes da Terra, os descubridores do asteroide 2015 TB145 quedaron abraiados cando o viron hai tres anos por dous motivos. Os investigadores do telescopio Pan-STARRS en Hawai viron que, baixo determinadas condicións de iluminación, ten un aspecto que recorda moito a unha caveira humana. E ademais, calcularon que o seu máximo achegamento ao noso planeta (a ‘só’ 486.000 km) ía producirse na noite do 31 de outubro, no que numerosas culturas arredor do mundo renden homenaxe aos seus defuntos.

171031_imagenGIGasteroideArecibo_NAIC-AreciboNSF
Imaxes reais do asteroide de Defuntos.

Con estas dúas peculiaridades, non se tardou en bautizalo como o asteroide de Halloween, a Gran Cabaza, o Cometa da Morte, o Asteroide Caveira ou dos Defuntos, por este peculiar aspecto que se pode ver nalgunhas das imaxes reais que se tomaron del.

E de novo, o 2015 TB145 volve achegarse ao planeta, segundo recolle a Agencia Sinc. Esta vez pasará máis lonxe, a case 40 millóns de quilómetros, unhas 105 veces a distancia media entre a Terra e a Lúa (DL). O seu máximo achegamento será o día 11 de novembro.

Desde 2015, o asteroide coñecido como o dos Defuntos continuou a súa viaxe arredor do Sol, cruzando as órbitas de Mercurio, Venus e Marte, e volve agora a pasar preto da Terra. A tal distancia, non supón ningún tipo de problema

“En realidade, a aproximación deste ano non se considera un paso cercano propiamente dito, xa que para iso tería que estar a menos dunhas poucas decenas de DL, o que non vai acontecer de novo ata 2085 e, aínda así, non chegará a estar tan cerca como en 2015″, explica a Sinc Pablo Santos Sanz, astrónomo do l Instituto de Astrofísica de Andalucía (IAA-CSIC) e coautor dun estudo sobre 2015 TB145.

Engade Santos Sanz, con todo, que “aínda que as condicións para as observacións non sexan tan favorables como as de hai tres anos, recolleranse novos datos sobre este obxecto que poden axudar a coñecelo mellor”. Porén, debido á distancia á que pasará, só se poderá percibir cos grandes telescopios da NASA ou a ESA.

Un cometa antigo

O asteroide ten uns 650 metros de diámetro, o seu período de rotación é de arredor de cinco horas, tarda 3,04 anos en completar a súa órbita e a súa reflectividade da luz do Sol é do 6%. Os astrónomos cren que pode ser un antigo cometa que perdeu os seus compostos volátiles despois de sucesivos pasos arredor do Sol.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.