Como se chaman as mozas e mozos galegos do século XXI? O Instituto Galego de Estatística (IGE) recolle desde o ano 2000 (os últimos rexistros son de 2017) os nomes dos neonatos de cada ano. Unha mostra máis do cambio da sociedade de Galicia.
Aínda que os nomes máis habituais do conxunto da poboación seguen sendo os tradicionais (Manuel, María, José, Carmen, Antonio ou Josefa, coas súas correspondentes combinacións de nomes compostos), a tendencia foi mudando co paso das décadas ata a actualidade.
Así, se atendemos aos rexistros recollidos desde o ano 2000, os nomes máis comúns dos mozos e mozas galegos que hoxe contan menos de 20 anos son Lucía, Pablo, Sara, Hugo, Daniel e Paula. Neste gráfico que elaboramos podes ver como evolucionaron:
Aínda que nomes como Manuel e María seguen estando entre os máis utilizados polos pais, xa non encabezan a listaxe coma no século XX. E por outra banda, desde o ano 2010 emerxen tamén outros nomes que non estaban entre os máis habituais ata agora, como Noa, Martina, Leo, Enzo, Izan ou Vera.
