Xoves 28 Marzo 2024

A precocidade sexual está relacionada cos xenes

A presión de grupo, o contexto familiar ou a situación socioeconómica dunha persoa son factores que inflúen na idade á que se inicia nas relacións sexuais ou á que ten o seu primeiro fillo. Esta afirmación non estrañaría a ninguén. Máis chocante resulta a conclusión dun novo estudo que relaciona a precocidade sexual coa información que cada un levamos nos xenes. O traballo publicouse en Nature Genetics.

Os investigadores, da Universidade de Cambridge (Reino Unido), analizaron os datos procedentes do ADN de máis de 380.000 persoas e neles atoparon 38 variacións xenéticas asociadas a comportamentos sexuais e reprodutivos, como o inicio da puberdade, a idade da primeira relación sexual e, mesmo, do primeiro parto, aínda que se descoñece o alcance desta contribución. A maioría dos xenes sinalados están implicados no desenvolvemento cerebral e neuronal.

Publicidade

“Un exemplo é unha variante xenética atopada en CADM2, un xene que controla a actividade cerebral. Esa variante asociouse cunha personalidade máis proclive a correr riscos, e tamén coa precocidade sexual e cun maior número de fillos”, explican os autores.

Os resultados mostran que a puberdade -cuxa media de idade decreceu dos 16,6 anos en 1860 ata os 10,5 anos en 2010, segundo un estudo publicado en Pediatrics– tamén está determinada por variacións na secuencia do ADN. Ademais, tal e como suxerían traballos previos, existe unha sincronización entre a idade de maduración sexual e a de inicio das relacións sexuais, e este vínculo está mediado polos xenes.

É o primeiro gran estudo que relaciona xenes e comportamentos sexuais

“Anteriores estudos asociaron a idade á que se inician as relacións sexuais con factores sociais. Pero este é o primeiro estudo de gran tamaño que tivo en conta os xenes e a bioloxía”, declara John Perry, investigador da Unidade de Epidemoloxía e un dos autores.

A través dun estudo de aleatorización mendeliana -método analítico para determinar relacións causales- analizáronse datos xenéticos procedentes do biobanco británico de 59.357 homes e 66.310 mulleres de idades comprendidas entre os 40 e 69 anos.

Da mostra, 18 anos foi a media de idade á que, tanto as mulleres como os homes, iniciáronse nas relacións sexuais. A media de idade á que as mulleres tiveron o seu primeiro fillo foi de 25 anos.

Despois, replicaron os resultados en 241.910 homes e mulleres de Islandia, e en 20.187 mulleres estadounidenses sas de máis de 45 anos con antepasados europeos. Así, atoparon que a idade de iniciación ao sexo e a idade do primeiro parto teñen un compoñente xenético moderado, e que ambas están correlacionadas de maneira independente co inicio da puberdade.

Investigacións previas realizadas polo mesmo equipo mostraron que unha puberdade temperá estaba estreitamente conectada cunha maior probabilidade de padecer enfermidades como diabetes, cancro ou problemas de corazón en idades avanzadas.

“Agora demostramos que a idade da puberdade tamén pode influír aos mozos, acelerando a precocidade sexual e empeorando o rendemento escolar”, afirma Ken Ong, outro dos autores desta investigación.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

O pulso xénetico entre nai e pai pola nutrición do feto

Científicos de Cambridge indentifican un sinal clave que o feto utiliza para controlar a subministración de nutrientes desde a placenta

A cantidade de virus… determina a gravidade da Covid-19?

Sarah L. Cady, viróloga da Universidade de Cambridge, explica neste artigo que sabemos e que non sobre a carga viral deste coronavirus

Impacto mundial do estudo sobre cancro liderado desde Galicia

O achado dun mecanismo de mutación clave nos retrotransposóns, impulsado desde o grupo de Xenomas e Enfermidade do CiMUS, traspasa fronteiras

Galicia lidera un traballo revolucionario sobre o papel dos xenomas móbiles no cancro

O grupo dirixido polo científico José Tubío publica tres artigos simultáneos en revistas do grupo “Nature” sobre o papel dos retrotransposóns