Venres 29 Marzo 2024

Este é o UM18, o novo monopraza fabricado na UVigo

A pouco menos dun mes do seu debut no circuíto de Assen en Holanda, o UM18 desvelou hoxe o seu aspecto a través dunha serie de imaxes dixitais, feitas públicas por UVigo Motorsport, a escudaría composta por estudantes da Universidade de Vigo que traballa na súa construción. Cun deseño moi similar ao do seu predecesor, o UM17, o novo vehículo mantén o chasis híbrido, o monocasco en fibra de carbono e o subchasis en aceiro tubular, co obxectivo de mellorar a refrixeración do motor, así como o motor Kawasaki Ninja 650cc, ao que se pretende sacar máis partido cun novo sistema de refrixeración e a substitución do cambio electrónico por un pneumático.

“En canto á aerodinámica damos un paso de xigante coa incorporación de aerodinámica activa e unha mellora do conxunto fondo plano-difusor. Todo isto controlado e supervisado de xeito electrónico, grazas ao visionado en tempo real de todas as telemetrías do monopraza”, explica María Couso, responsable do departamento de Organización e Márketing de UVigo Motorsport.

Publicidade

Unha vez rematado o monocasco, o equipo ten por diante a fabricación dos compoñentes aerodinámicos

Rematada a fabricación do monocasco en fibra de carbono, o seguinte paso é darlle o mellor acabo posible e solucionar algúns defectos, para empezar a continuación a montaxe de todos os demais compoñentes, como o motor, a dirección ou a suspensión. “Neste intre atopámonos nunha das etapas máis difíciles no transcurso do proxecto. O único que nos queda por rematar da fabricación do UM18 son os compoñentes aerodinámicos: aleróns, tanto dianteiro como traseiro, pontóns, difusor…que agardamos ter finalizados a mediados deste mes”, sinala Couso, que explica que este ano adiantaron a fabricación das pezas o máximo posible e por iso xa as teñen preparadas para montar no coche en canto o monocasco estea finalizado. A competición de Holanda, Formula Student Netherlands, esixe presentar un vídeo co vehículo en marcha antes do 22 de xuño, aínda que a con posterioridade poderían realizarse pequenas modificacións.

Traballos de fabricación do UM18. Foto: Duvi.
Traballos de fabricación do UM18. Foto: Duvi.

26 estudantes, procedentes das escolas de enxeñaría Industrial, Minas e Enerxía e Telecomunicación, integran a día de hoxe o equipo UVigo Motorsport que se encarga de todo o proceso de construción do UM18, unha competición que inclúe probas dinámicas, na que o protagonismo é do monopraza, e estáticas, que contemplan a xustificación de custos, deseño e plan de negocios. “Formula Student abrangue moitos máis aspectos que os puramente automobilísticos e por iso unha das iniciativas que empezamos a realizar durante esta temporada foi abarcar máis ámbitos dentro da universidade. Aspectos como a imaxe, a negociación, as finanzas… e por iso buscamos xente, procedente doutras carreiras, que queira formar parte do equipo”, sinala María Couso.

Durante esta temporada o equipo contou co apoio, non só económico, senón tamén material, de recursos e de formación, de máis de 60 empresas e institucións. “Neste aspecto, as verdade é que somos uns privilexiados. Ter a oportunidade de que grandes empresas e institucións se involucren e nos axuden no proxecto para despois representarlles e levar a súa imaxe polo mundo é unha auténtica honra”, considera a responsable do departamento de Organización e Márketing do equipo.

O debut do UM18, en Assen

Na recta final do proxecto, María Couso considera esta “unha das mellores experiencias que viviremos como estudantes e como persoas. Profesionalmente o que aprendes non o aprendes en ningún outro sitio e persoalmente a recompensa é incalculable. Traballar man a man con compañeiros doutras especialidades ou carreiras, con mentalidades e personalidades diferentes, pero sempre dirixidos a un único obxectivo fai que persoalmente sexa moi emocionante cada día”, asegura Couso, que non obvia a dificultade que supón compaxinar estudos, traballo e proxecto. Non obstante, tamén recoñece que “cando podes ver o monopraza rodar no circuíto, o recibir un premio en Montmeló, como o ano pasado, todos os momentos de estrés desaparecen e só gozas das cousas positivas”.

Convencidos de que o UM18 pódelles deparar grandes alegrías “non só para nós, senón tamén para as institucións e empresas ás que representamos e que diariamente están presentes no proxecto”, o equipo da Universidade de Vigo competirá entre os días 9 ao 12 de xullo en Holanda e entre o 21 e o 26 de agosto en Montmeló. 

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Volve o túnel de Xibraltar que soñou Comerma

O enxeñeiro establecido en Ferrol deseñou unha vía submarina de 19 quilómetros para comunicar Europa e África

Enxeñería solidaria para rachar coa fenda dixital: “Ter acceso á rede é unha necesidade básica”

Estudantes da Escola de Enxeñería da UVigo recompoñen equipos informáticos vellos para facelos funcionais e doalos a persoas que os precisan

Arrecifes artificiais para protexer os ecosistemas mariños na costa galega

Un proxecto de enxeñeiros da UDC prevé instalar estas estruturas nas rías de Ares e Ferrol, no marco dunha colaboración coa Xunta de Galicia

As pontes sobre o Ulla en Gundián: arte por duplicado para salvar unha xeoloxía singular

Os viadutos que se erguen no paso de San Xoán da Cova unen as beiras do río nun afloramento de cuarzo de grande interese mineral