Dez proxectos galegos foron seleccionados pola Fundación Telefónica entre os 126 finalistas do programa formativo Think Big, dirixido a aumentar as oportunidades laborais dos mozos e mozas de entre 15 e 30 anos. Para participar, é preciso presentar unha idea innovadora que utilice as competencias dixitais, co obxectivo de “aprender facendo” e desenvolver cadansúa idea empresarial.
Entre as ideas galegas destaca Social Defender, creada por Ahmed Anadi e Diego Fontán, unha ferramenta que fai un seguimento en tempo real das redes sociais para detectar casos de acoso escolar e abuso por parte dun usuario ou grupos de usuarios contra outra persoa. A través dun sistema de alertas no teléfono móbil, o usuario pode saber se foi insultado, aínda sen ter sido mencionado.
Esta proposta foi seleccionada no evento HackforGood, celebrado en Vigo no mes de marzo, onde resultou gañadora xunto a “Comprimir para vivir”, unha idea baseada nun sistema de almacenamento de enerxía baseado en aire comprimido, con capacidade para substituír a elementos contaminantes, como as baterías, ofrecendo así unha enerxía limpa, autónoma, sostible e duradeira.
Dez proxectos galegos, finalistas
Amais destes dous proxectos, que accederon directamente desde HackForGood, a Fundación Telefónica escolleu a outras oito iniciativas con selo de mozos e mozas galegas para pasar ao Nivel 1 do programa. Son “En busca da felicidade”, de Cintia Loira e Aarón Mallo, que propón a creación dunha web para mellorar a calidade de vida dos enfermos, poñéndoos en contacto con médicos e asociacións de pacientes; “ATúlado”, ideado por Arturo Vargas, que pon en contacto aos usuarios con acompañantes terapéuticos; “Pdstrapp”, de Brais Piñeiro, unha aplicación que ofrece descontos e recompensas aos usuarios que se despracen pola cidade a pé, en bicicleta ou por outros medios alternativos; “AlNAtur”, de Alejandro Vargas, que pon en contacto a produtores hortícolas e consumidores; “Carry App”, de Daniel Rodríguez, que propón unha aplicación para enviar ou recibir mercadorías a través dun grupo de usuarios dispostos a transportalas a cambio dunha contraprestación económica; “Impresión-Arte”, impulsada por Iago Lage, baseada na divulgación da impresión en 3D; “As drogas e a esquizofrenia”, de Ana Pintané, unha campaña que incide nos efectos do cannabis na saúde mental; e “DesenREDAndo”, de Laura Vela, que busca formar a pais, nais, alumnos e profesores no uso das ferramentas dixitais e as redes sociais.
