O Ministerio do Interior, a través da Dirección Xeral de Protección Civil e Emerxencias, está a realizar as probas correspondentes para verificar o funcionamento do protocolo ES-Alert para enviar alertas á poboación que se atope nunha zona afectada por emerxencias ou catástrofes inminentes. É un sistema tamén coñecido como 112 inverso.
Previuse un calendario de probas nas diferentes zonas do Estado. Os centros de resposta a emerxencias, en coordinación co Centro Nacional de Seguimento e Coordinación Emerxencias do Ministerio do Interior, enviarán mensaxes simuladas alertando dun risco de protección civil e un asubío, acompañado de vibración, nos teléfonos móbiles alertará da recepción da mensaxe. E a Galicia tócalle este mércores.
O sistema É-Alert foi despregado o pasado 21 de xuño, e é futo da colaboración entre os Ministerios do Interior e de Asuntos Económicos e Transformación Dixital, sendo financiado con fondos de recuperación e resiliencia. Esta tecnoloxía, que se pon a disposición das autoridades de protección civil de ámbito estatal e autonómico, suma unha nova ferramenta de alertas á poboación ás que xa conta o Sistema Nacional de Protección Civil.
Soará un asubío nalgúns teléfonos móbiles, anunciando que se trata dunha mensaxe de proba do sistema de alertas de protección civil a través das redes de telefonía móbil e sinalando que non hai que facer nada especial. É unha proba para asegurar que funciona adecuadamente.
O texto da mensaxe
Pero, cal é o texto da mensaxe? Protección Civil explica que dirá: “Isto é unha mensaxe de proba do novo sistema español de avisos de emerxencias a través de redes de telefonía móbil ‘112 inverso’ enviado polos Servizos de Protección Civil. Unha vez lido a mensaxe pulse ‘Aceptar’ para eliminalo da pantalla. Non é necesario realizar ningunha outra acción”.
O sistema permite seleccionar o envío da mensaxe en español e inglés. Doutra banda, o Ministerio do Interior non controla aos destinatarios, é dicir, respéctase a protección de datos, porque para envialo cóntase cun sistema cego que non sabe nada do individuo que recibe a alerta, senón que se envía aos cartóns SIM pola localización das mesmas.