A loita contra a ciberdelincuencia seguirá sendo unha prioridade para a Administración galega e por iso nos tres próximos anos se van investir un total de 12 millóns de euros nas infraestruturas tecnolóxicas, servizos e modelos de colaboración público privada, segundo anunciou onte na clausura do encontro Ciber.gal a directora da Axencia para a Modernización Tecnolóxica de Galicia (Amtega), Mar Pereira.
Tamén lembrou que Galicia foi a primeira comunidade en poñer en marcha unha estrutura de cooperación público-privada en materia de ciberseguridade, o Nodo galego de Ciberseguridade, Ciber.gal, impulsado dende a Xunta. Na súa constitución en xullo do 2020, participaron o Instituto Nacional de Ciberseguridade e o Centro Criptolóxico Nacional, as catro Deputacións galegas e a Federación Galega de Municipios e Provincias. Dende entón, ademais, sumáronse ao nodo máis de 40 entidades privadas e as tres universidades galegas.
Construción dun centro de ciberseguridade
Ademais, estase a traballar para ampliar a carteira de servizos de ciberseguridade, tanto para sector público autonómico como para a Administración local e outras administracións públicas, a cidadanía e o tecido empresarial, en particular pemes e autónomos, grazas a un acordo marco aprobado no Consello da Xunta.
Nesta liña, ademais está prevista a construción do Centro de Ciberseguridade de Galicia, que aglutinará a prestación destes servizos especializados así como reforzará a actividade do Centro de Resposta a Incidentes, que funciona dende 2018 e centraliza a mitigación do impacto dos incidentes de seguridade no ámbito da Administración autonómica. As tecnoloxías e servizos vinculados á ciberseguridade xunto coa intelixencia artificial e as posibilidades sobre as tecnoloxías 5 G, constitúen un dos tres alicerces da Estratexia Galicia Dixital 2030.
1.400 inscritos no Ciber.gal
Preto de 1.400 persoas inscritas tomaron parte no primeiro encontro galego de ciberseguridade, Ciber.gal que reuniu a cidadáns, profesionais de distintos ámbitos empresariais e do sector público. No transcurso das duas xornadas do encontro celebráronse paneis, conferencias e outras actividades sobre os retos da seguridade na contorna dixital. O encontro celebrouse no novo Edificio Fontán da Cidade da Cultura de Galicia.
O evento estivo estruturado en tres bloques. O primeiro deles englobou actividades destinadas ao tecido empresarial con paneis e charlas sobre axudas para impulsar a ciberseguridade na empresa, os riscos aos que se enfrontan as empresas e as obrigas legais en materia de ciberseguridade.
Máis actividades
Para o colectivo da cidadanía, que se desenvolveu na tarde do 10 de novembro, celebrouse a final do concurso Ciberseguridade no cole!, destinado aos menores e organizado por Telefónica; e un Capture The Flag, organizado pola Cátedra R en ciberseguridade e Gradiant. Ademais, interveu Gianluca D’Antonio, presidente de ISMS Forum.
A segunda xornada do encontro estivo destinada á administración pública coa participación do Centro Criptolóxico Nacional; a intervención do divulgador Marc Vidal, e a celebración dun debate que agrupa os máximos responsables de organismos e entidades autonómicas con competencias en materia de ciberseguridade: a Axencia de Ciberseguridade de Cataluña, a Axencia Dixital de Andalucía, a Generalitat de Valencia e a Amtega.
