O sistema de intelixencia artificial Veraquo foi creado no centro tecnolóxico Gradiant —con sede en Vigo— co obxectivo de detectar contidos manipulados ou xerados artificialmente. A nova tecnoloxía analiza imaxes, vídeo e audios, incluídas as voces clonadas, e dispón de capacidades orientadas á rastrexabilidade de contidos dixitais. O obxectivo é que esta plataforma sirva para que empresas e organizacións prevexan fraudes, suplantacións de identidade, falsificación documental e outros usos maliciosos da IA. Tamén pode servir para que os medios de comunicación verifiquen imaxes, vídeos e audios antes da súa publicación ou difusión.
A nova ferramenta de Gradiant serve para verificar a autenticidade da información e reducir os riscos financeiros e reputacionais asociados ao uso malicioso da IA xerativa. Con esta premisa, o sistema acaba de recibir un recoñecemento internacional nos CyberSecurity Breakthrough Award 2026, ao ser gañador na categoría Deepfake Detection Solution of the Year. O obxectivo destes galardóns é “premiar a excelencia” e recoñecer as empresas “máis innovadoras que están redefinindo a ciberseguridade”.
Do auténtico ao manipulado
“Este recoñecemento chega nun momento no que a expansión da IA xerativa está a transformar a natureza da fraude dixital. A creación de contidos sintéticos é cada vez máis accesible e sofisticada, á vez que se reduce a capacidade de distinguir a primeira ollada entre contido auténtico e contido manipulado”, sinala Juan González, director de Seguridade e Privacidade en Gradiant. “A IA xerativa está a cambiar a relación entre creación e verificación de contidos. Canto máis doado resulta xerar información sintética, máis importante é dispoñer de mecanismos capaces de analizar a súa autenticidade e achegar evidencias para a toma de decisións. Neste escenario, a verificación de contidos axuda a empresas e organizacións a previr fraudes e tomar decisións con maior confianza”, conclúe.
Procesos empresariais e sociais
Segundo trasladan dende Gradiant, este recoñemento permite que o centro tecnolóxico avance cara a un modelo no que a verificación de contidos forme parte das capas de seguridade necesarias para operar con confianza en contornas dixitais, especialmente a medida que a IA xerativa se intrega en procesos empresariais e sociais. “A capacidade de verificar aquilo que vemos, escoitamos ou recibimos será un elemento fundamental para preservar a integridade das decisións dixitais e reducir a exposición a novas formas de fraude. Nun mundo no que xerar contido falso será cada vez máis sinxelo, verificalo será tan importante como crealo”, engade González.
O centro tecnolóxico presentou Veraquo internacionalmente na pasada edición da RSA Conference 2026 de San Francisco, un dos principais encontros mundiais de ciberseguridade, onde mostrou as súas capacidades para detectar imaxes e vídeos manipulados e voces clonadas.
