A fibra óptica chegará á rúa do Franco este verán e á totalidade do conxunto histórico compostelán nun prazo estimado de sete meses, segundo as previsións do plan de despregamento que o operador Orange presentou hoxe á directora da Axencia para a Modernización Tecnolóxica de Galicia (Amtega), Mar Pereira, ao alcalde da cidade, Xosé Sánchez Bugallo; e a directora xeral de Patrimonio da Consellería de Cultura e Turismo, María del Carmen Martínez.
Estas institucións veñen colaborando nos últimos meses para facilitar o despregamento de redes de telecomunicacións nesta zona especialmente protexida coa elaboración dun catálogo de solucións técnicas e o posterior lanzamento dunha consulta pública a operadores. O proceso rematou coas propostas de R, Telefónica e Orange, operador que solicitou a licenza municipal a semana pasada.
A comisión asesora de patrimonio do casco histórico informou hoxe favorablemente a proposta de despregamento para todo o ámbito da cidade histórica e o proxecto concreto para a rúa do Franco. Deste xeito continuará a tramitación administrativa da licenza, co que o operador espera poder iniciar o despregamento este verán nesta rúa para continuar progresivamente en todo o conxunto histórico nun prazo aproximado de sete meses.
O alcance desta iniciativa abrangue todo o ámbito do Plan Especial de Santiago, non só a améndoa do casco histórico. O proxecto contempla tamén que se compartan as infraestruturas, o que permitirá a outros operadores poder dar servizo no conxunto histórico utilizando as redes de Orange.
Para a extensión da fibra o operador empregará caixas de baixo impacto nas fachadas e tamén as canalizacións existentes. Son solucións acordadas durante o proceso de consulta aberta a operadores lanzado a finais do pasado ano por parte da Amtega, o Concello e a Consellería de Cultura e Turismo que se fraguaron tomando como punto de partida o Catálogo de Solucións Técnicas aprobado o pasado verán polo Goberno galego.
Este catálogo foi elaborado pola Amtega, o operador público Retegal e a Dirección Xeral do Patrimonio Cultural para abordar unha problemática presente en toda a Unión Europea para a que ata agora non se ofrecera ningunha solución.
Para a elaboración desta guía partiuse do caso concreto de Santiago de Compostela e en colaboración co Concello, co Consorcio de Santiago e cun equipo multidisciplinar (integrado por arquitectos, enxeñeiros de telecomunicación e técnicos proxectistas especializados en despregamentos de fibra óptica), fixéronse unha serie de propostas viables para outros conxuntos históricos. O camiño que agora emprende Santiago poderá ser seguido polos cascos vellos doutras cidades galegas no futuro.
O operador empregará caixas de baixo impacto nas fachadas para o despregamento da fibra e aproveitará as canalizacións existentes
Amtega apunta ademais que grazas aos plans da Xunta e do Estado estanse a realizar despregues de fibra con subvencións públicas en 9.000 núcleos de poboación de 310 concellos. Estas actuacións permitirán que este mesmo ano o 80 por cento dos galegos teñan cobertura da internet de 100Mbps a través de redes fixas, unha porcentaxe que chegará ao 90 por cento no 2021 e que se pode ampliar con convocatorias de subvención a operadores que aínda están pendentes.
Ademais da extensión da fibra en núcleos de poboación, os plans da Xunta e do Estado permitiron dotar a tódolos centros públicos educativos de primaria e secundaria e á práctica totalidade dos xulgados con internet de 100Mbps ou máis e que o 93 por cento da superficie empresarial ocupada dispoña desta conexión ultrarrápida.
