Os científicos Marcos Ortega e Jorge Novo, do Centro de Investigación TIC (CITIC) da Universidade da Coruña, forman parte do equipo do proxecto Ocuexplorer 5G, que ten por obxectivo facer máis accesible o coidado oftalmolóxico de pacientes, principalmente a persoas maiores, persoas con problemas de mobilidade e procedentes de lugares con difícil acceso aos centros médicos mediante a tecnoloxía de telecomunicacións 5G, intelixencia artificial e novas técnicas ópticas e telecontrol.
Ocuexplorer, coordinado polo Centro Internacional de Oftalmoloxía Avanzada Profesor Fernández Vigo (CIOA) e liderado por Telefónica, é unha das iniciativas impulsadas polo Goberno español a través dunha convocatoria pública de axudas cun presuposto agregado de máis de 36 millóns de euros, dos que máis de 10 serán cofinanciados pola Entidade Pública Empresarial Red.es a través dos fondos FEDER da Unión Europa. O proxecto inclúe oito casos de uso que se desenvolverán en Galicia a cargo da Unión Temporal de Empresas composta por Telefónica, Ericsson, Nokia, Cinfo, Idronia, Telnet Redes Inteligentes e o Centro Internacional de Oftalmoloxía Avanzada Fernández-Vigo.
O prototipo de teleoftalmoloxía avanzada Ocuexplorer 5G, segundo expón o CiTIC, “constitúe un mecanismo de axuda para os oftalmólogos, que permita chegar a unha maior poboación de forma máis eficiente, avanzando no desenvolvemento dunha oftalmoloxía preventiva para toda a poboación”.
A teleoftalmoloxía, engade o centro coruñés nunha nota de prensa, pode ser unha ferramenta clave durante a pandemia da Covid-19, xa que sería posible facilitar as consultas a distancia, evitando desprazamentos aos centros médicos e evitando así parte do risco de exposición ao SARS-CoV-2. O prototipo desenvolvido polo consorcio formado polo Centro Internacional de Oftalmoloxía Avanzada Profesor Fernández Vigo (CIOA), Telefónica, Idronia e o CITIC consta dun dispositivo que toma imaxes de alta definición do ollo, que posteriormente filtra utilizando técnicas de Intelixencia Artificial. As imaxes envíanse ao oftalmólogo en tempo real, aproveitando o ancho de banda que permite a rede móbil 5G.
O cometido de Marcos Ortega e Jorge Novo é o de desenvolver o software de Intelixencia Artificial capaz de analizar retinografías e identificar potenciais riscos de patoloxías oculares. O sistema permite realizar un cribado de cantidades masivas de información e notificar ao oftalmólogo cada vez que se identifique unha retinografía con parámetros fóra da normalidade, para que sexa examinada de forma axeitada. Desta maneira, Ocuexplorer 5G achegará progresos na prevención e diagnóstico das enfermidades do ollo, conseguindo un sistema de oftalmoloxía preventiva máis avanzado e intelixente a través da nova xeración de tecnoloxía móbil 5G.
