O investigador do CiTIC da Universidade da Coruña Carlos Fernández Lozano puxo en marcha unha páxina web que permite seguir día a día a evolución da doenza Covid-19 en España. Segundo explican desde o CITIC idea xurdiu a partir do traballo realizado polo investigador Rubén Fernández Casal, que comezou a compilar os datos do Ministerio de Sanidad relativos aos contaxios polo coronavirus SARS-CoV-2. A iniciativa conta co respaldo do comité de expertos da “Acción Matemática contra o Coronavirus” do Comité Español de Matemáticas (CEMat), a través do seu presidente Ricardo Cao, tamén investigador do CITIC, que ten o obxectivo de axudar ao Goberno a atopar solucións ante a crise sanitaria.
A páxina web permite consultar un mapa cos datos relativos ao número de casos confirmados por comunidades autónomas nas últimas semanas, así como os pacientes recuperados e os falecementos. O investigador das áreas de Intelixencia Artificial e de Ciencia e Enxeñaría de Datos do CITIC e profesor da Facultade de Informática da UDC, Carlos Fernández Lozano, apunta que a idea é “introducir máis datos relacionados con ingresos en UCI, incidencia, número de hospitalizacións, etc., e incluír modelos preditivos para utilizar a plataforma como punto de unión de múltiples investigacións”. Deste xeito, o site permitirá aportar máis claridade sobre a evolución da pandemia en España.
Así, o investigador do CITIC Rubén Fernández Casal encárgase da descarga de datos e procesado desde orixe, mentres que Carlos Fernández Lozano creou a ferramenta a partir do procesamento destes datos. Tamén están traballando para mellorar o rendemento e a capacidade de carga do sistema.
Segundo explican os investigadores da UDC, o obxectivo foi desenvolver un sistema de visualización da información a través de ferramentas como Shiny e R. Todos os datos e as ferramentas son abertos e están a disposición de quen desexe usalos no propio portal.
Todos os detalles, no web do CiTIC dedicado ao seguimento da Covid-19.
