Únete á nosa canle de Whatsapp
“O 26 de marzo a Unión Europea votará se se debe proceder cunha proposta de directiva sobre os dereitos de autor que, se fose aprobada, danaría significativamente a Internet aberta que coñecemos”. Así comeza o comunicado difundido hoxe pola Galipedia, a versión galega da Wikipedia, que decidiu permanecer ‘apagada’ durante tres días en protesta contra esta nova lei de copyright da UE.
Dende este domingo 24 de marzo, todas as buscas na Galipedia redirixen á páxina do comunicado que critica esta nova lexislación comunitaria. No texto mencionan a oposición á nova directiva expresada por diversas figuras: “Xa se opuxeron firmemente a esta proposta máis de 70 científicas e científicos informáticos, entre eles o creador da Web Tim Berners-Lee , 169 académicas e académicos, 145 organizacións que traballan no campo dos dereitos humanos, liberdade de prensa, investigación científica e industria tecnolóxica, e a Fundación Wikimedia, a organización sen ánimo de lucro que promove, entre outros proxectos, esta enciclopedia libre”.
A Wikipedia en galego “decidiu escurecer tódalas páxinas da enciclopedia. Queremos seguir ofrecendo unha enciclopedia aberta, colaborativa e gratuíta con contido verificable. Chamamos a todos os membros do Parlamento Europeo a votar en contra do texto actual, reabrir a discusión e reconsiderar as numerosas propostas da asociación Wikimedia así como a extensión da liberdade de panorama a toda a UE e a protección do dominio público”.
A Galipedia non ofrecerá os seus contidos durante 72 horas, ata o vindeiro martes 26 de marzo, día da votación da proposta lexislativa europea.
