Únete á nosa canle de Whatsapp
As tres mozas do colexio Peleteiro de Santiago que gañaron hai uns meses o concurso nacional Audi Creative Challenge (para estudantes emprendedores) volveron hai unhas semanas da súa estadía en Silicon Valley, onde tiveron a oportunidade de presentar o seu proxecto de e-book educativo para o terceiro mundo, Globed, a representantes das empresas tecnolóxicas máis importantes do mundo como Google, Twitter ou Netflix, entre outras. Agora o desafío é o de incorporar as melloras que lles suxeriron nestas grandes compañías e poder obter os recursos suficientes para facer realidade o proxecto.
Clara Pantín, Paula Lamas e Nalú Rodríguez móstranse abraiadas pola acollida que tiveron en Silicon Valley e polo interese que espertou o seu proxecto entre algunhas das empresas máis coñecidas do mundo e que destacan, precisamente, pola súa creatividade. “O que nos impresionou e que á xente de alí encantáballes o noso proxecto e consideraban que podía ser moi útil. Ademais, mostraron a súa xenerosidade para aportarnos ideas que poden mellorar o dispositivo e que estamos a incorporar agora”, indica Paula Lamas.
O dispositivo ideado polas tres mozas de Santiago consiste nun pico-proxector (con sistema operativo Android), unha webcam, micrófono, altavoces e placas solares que permiten difundir contido educativo cun baixo custe. Está deseñado para permitir o acceso barato á educación a países do terceiro mundo e mesmo podería utilizarse tamén nos campos de refuxiados. Xa entraron en contacto cunha ONG presente nun campo en Grecia.
As mozas aínda non acaban de crer a oportunidade que tiveron para dar a coñecer a súa idea en Silicon Valley, pero xa están a traballar na procura de financiamento para facer realidade o seu proxecto, ao mesmo tempo que incorporan diversas melloras ao dispositivo, entre elas estudan a posibilidade de incluír contidos de ocio, unha idea que xurdiu despois da visita ás oficinas de Netflix.
As mozas están a traballar na procura de financiamento para facer realidade o proxecto
“Estamos pensando na posibilidade de crear unha fundación porque sería a mellor opción para que tanto empresas como particulares podan achegar fondos para facer realidade o proxecto”, sinala Paula Lamas. O propio colexio Peleteiro e a empresa Imagine (que organizou a viaxe a California) están axudándoas nesta tarefa. En outubro terán que viaxar a Barcelona para facer unha presentación final do proxecto e, ademais, en poucos días comezan de novo as clases polo que lles agardan unhas semanas con moito traballo.
A ilusión que mostran por sacar adiante a súa idea é a mellor garantía do seu éxito. Agardan que en novembro algúns prototipos do dispositivo podan viaxar a África para comprobar sobre o terreo o seu funcionamento. Outro dos retos pendentes e ir rebaixando o custe que terá o dispositivo. “En Silicon Valley dixérennos que aínda que o custe actual do prototipo supera os cen euros podería rebaixarse a unha cantidade entre os 40 e os 70 euros”, apunta Paula Lamas. Os que queiran ampliar información sobre o dispositivo poden consultar a páxina web do mesmo www.globed.school.
