Xoves 28 Marzo 2024

Drones contra os incendios e as especies invasoras

Desenvolver unha tecnoloxía que permita traducir as imaxes captadas por vehículos aéreos non tripulados en información coa que traballar na detección e no seguimento da evolución de especies vexetais invasoras, así como na detección de posibles factores de risco de lumes forestais. Este é o propósito central do proxecto que desenvolverán os investigadores e investigadoras do Cinae (Centro de Innovación Aeroespacial de Galicia), grazas ao convenio asinado nesta xornada coa Deputación de Pontevedra. Cunha duración de dous anos, o acordo contempla o investimento de 170.000 euros nun proxecto centrado no desenvolvemento dun sistema de procesado da información obtida por drones, satélites ou sensores para poder intervir nos sectores medioambiental, agroforestal e mariño.

Pretenden facer un inventario dos bosques “con maior grao de combustibilidade”

O reitor da Universidade de Vigo e presidente do padroado do Cinae, Salustiano Mato, e a presidenta da institución provincial, Carmela Silva, rubricaron nesta xornada este acordo, nun acto que contou tamén coa participación do director xeral do Cinae, Antonio Castro; o director técnico da Fundación Cinae, o profesor Fernando Aguado, e o responsable da súa Área de Sistemas non Tripulados, o investigador da UVigo Higinio González. “Cinae está desenvolvendo xa un traballo importante en temas espaciais e de avións non tripulados e este convenio vai permitir desenvolver unha serie de aplicacións que permitan ter unha capacidade de información e detección sobre o territorio que permita anticipar problemáticas importantes, como por exemplo os incendios”, salientou Mato dunha metodoloxía que permitiría, por exemplo, “comezar a facer un inventario” das zonas boscosas con maior grao de combustibilidade e así “poder actuar dunha forma máis efectiva”.

Publicidade

Representantes da Deputación, a UVigo e o Cinae asinan o convenio. Foto: Duvi.
Representantes da Deputación, a UVigo e o Cinae asinan o convenio. Foto: Duvi.

Silva, pola súa banda, salientou que este proxecto permitirá, mediante o uso de vehículos aéreos non tripulados, “controlar as zonas de incendios para, cuns detectores infravermellos, detectar novos focos de lume e, ademais, delimitar os perímetros dos incendios con datos básicos para os servizos de extinción”. De aí que a presidenta do ente provincial amosase a súa “grande satisfacción” por poder asinar convenios “que teñen o punto de mira no beneficio da nosa cidadanía”, máxime nun eido como a “prevención dos nefastos efectos” dos lumes forestais.

O proxecto piloto comezará en varias zonas de Pontevedra

Segundo explica González, trátase dun “proxecto piloto” que, a través dos vehículos aéreos non tripulados, realizará unha serie de campañas “sobre unhas zonas da xeografía de Pontevedra, seleccionadas de acordo cos técnicos da Deputación”. Nelas realizarase o traballo de campo dun proxecto que ten como eixo a xeorreferenciación e procesado das imaxes obtidas polos drones, co propósito de que dea como resultado “unha información que o usuario poida entender”, como por exemplo, “o número de hectáreas afectadas por unha determinada planta e como este vai mudando ao longo do tempo”.

O obxectivo final, engade, e desenvolver “metodoloxías de traballo aplicables a outras áreas do territorio durante períodos de tempo máis grandes”, a través da automatización dese procesado da información recollida nas imaxes, aproveitando, por exemplo, a alta resolución espacial da información que pode obterse a través dos sistemas aéreos non tripulados.

Nese senso, o convenio asinado nesta xornada abrangue tanto o desenvolvemento destas tecnoloxías de procesado de datos, como poñer a disposición dos técnicos da Deputación as imaxes obtidas, así como colaborar en accións mitigadoras dos efectos dos lumes forestais, ao igual que o desenvolvemento de actividades divulgativas destas tecnoloxías.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

00:36:16

“As mulleres teñen que dar un paso adiante e crer que poden emprender”

Na segunda sesión de Ciencia en Feminio a CEO de Hifas da Terra, Catalina Fernández, explica que a ciencia debe ser “vendible” e beneficiosa para a vida das persoas
00:36:16

EN DIRECTO | Ciencia en feminino. O emprendemento das mulleres

A doutora en Investigación Clínica en Oncoloxía pola Universidade de Santiago, Catalina Fernández, conta a súa experiencia como directora xeral de Hifas da Terra

Cales foron as causas da seca que precedeu aos incendios de Australia? Un equipo de Ourense ten a clave

A investigadora Milica Stojanovic, do grupo EphysLab da UVigo, centrou o seu traballo en analizar as fontes de humidade da zona
00:57:23

“En ciencia, moitas veces tes que demostrar que es tan capaz como un home”

A primeira actividade do ciclo 'Ciencia en feminino' analiza as vocacións científicas e como mantelas pese aos obstáculos por ser muller