A Escola de Enxeñería de Telecomunicación da Universidade de Vigo ofrece por segundo ano seu Curso de Introdución á Ciberseguridade. O obxectivo é dotar ao alumnado dunha visión de conxunto dos diferentes aspectos que conforman a ciberseguridade e das saídas profesionais que aporta. O prazo de incrición estará aberto ata o 1 de xuño, a mesma data na que se iniciará a docencia. As clases serán en horario de tarde os xoves e venres nos que non haxa exames.
O director da escola, Íñigo Cuíñas, explica que o curso está dirixido a persoas tituladas do eido da Telecomunicación ou a Informática e a profesionais interesados en dirixir as súas carreiras profesionais cara o eido da ciberseguridade, “un campo que está crecendo e agardamos que o siga facendo nos vindeiros anos”.
Ao longo das 44 horas de docencia teórica e práctica, os asistentes achegaranse dende unha perspectiva introductoria a este campo e coñeceran o goberno e a arquitectura da seguridade en Internet; as tecnoloxías dispoñibles neste eido; a seguridade en redes, sistemas e software; a lexislación deste campo; aprenderán a xestionar incidentes e a auditar a seguridade dos equipos; e, para rematar, realizarán un caso práctico centrado na xestión da seguridade na Axencia Tributaria.
O curso será impartido por profesionais dedicados á ciberseguridade en empresas galegas o do resto de España, entre elas: R Cable e Telecomunicacións Galicia, Inprosec, DimensionData, Ultreia, Tarlogic Security SL, Incibe (Instituto Nacional de Ciberseguridade-Ministerio de Industria), Risk Advisory IT & Ciber Risk Services, Deloitte, a Axencia Estatal de Administración Tributaria e Security Consulting & Business Development en Accenture.
