Así é The Waylanders, un videoxogo de fantasía na Galicia celta e medieval

O ambicioso proxecto de Gato Salvaje Studio, impulsado por micromecenado, gaña o premio dos enxeñeiros informáricos galegos

Unha das escenas de "The Waylanders". Fonte: Gato Salvaje.

Nun hotel de Santiago de Compostela, máis de 350 enxeñeiros informáticos e outros convidados reúnense esta noite para entregar os premios anuais da profesión, que poñen en valor o traballo e as iniciativas empresariais do mundo das TIC. E entre eses recoñecementos, un premio é para The Waylanders, de Gato Salvaje Studio, o primeiro videoxogo de rol ambientado e desenvolto en Galicia, e con localizacións na Torre de Hércules e na Catedral de Santiago e nas contornas naturais do Ézaro e Fisterra.

Este proxecto, que pasou un proceso previo de procura de financiamento a través de micromecenado, transporta aos xogadores a un mundo de fantasía ambientada na Galicia celta e medieval. Un xogo de rol que narra a historia dun grupo de guerreiros que viaxa no tempo e que recibiu grandes eloxios sobre a súa dirección artística, aínda que tamén algunhas observacións polo que queda por pulir e as partes por desenvolver. 

Sergio Prieto, o CEO de Gato Salvaje, recoñece que sacar adiante este proxecto foi difícil, e que chegaron á data de lanzamento coa lingua de fóra. “O mundo non acompañou”, ironiza. A pandemia paralizou a todos os sectores, e a The Waylanders colleuno nun dos peores momentos. “Estabamos a desenvolver a parte da dobraxe ao inglés, para a que contabamos con moitísimo persoal estranxeiro que tiña que vir a Galicia”, conta dende a súa oficina na Coruña. “Cando as restricións permitían traballar en España, non o permitían nos países onde estaban os actores; e viceversa“, láiase, porque como explica, “a animación e a dobraxe son procesos que van da man, e un non pode avanzar sen o outro”. Pero tamén tiveron que facer fronte ao peche de sociedades colaboradoras: “Algunhas das empresas coas que traballabamos non puideron superar a crise”. 

O videoxogo, o primeiro feito e ambientado en Galicia, foi lanzado ao mercado o pasado febreiro 

O rendemento no mercado de The Waylanders cupre as expectativas. “É un produto de nicho, un xogo de rol de ambientación galaica non é un produto masivo, pero estamos a ver que nas últimas semanas están aumentando as vendas e a puntuación”, recoñece Prieto. Ademais, os inversores que participaron no crowdfunding xeraron unha comunidade que está a dar moito feedback e que lles permite mellorar o produto. 

A industria dos videoxogos, ao igual que o resto das TIC, é un sector en crecemento en Galicia. Dúas Escolas Superiores de Enxeñaría Informática e unha Facultade, a de Santiago, suman máis de 500 graduados cada ano. E aínda así, non chega para cubrir a demanda de traballadores.  

“Para o sector dos videoxogos non temos que contar só cos enxeñeiros informáticos, tamén traballan ilustradores, deseñadores, graduados de belas artes e moitos outros profesionais que estamos a formar en Galicia”, lembra Fernando Suárez Lorenzo, presidente do Colexio Profesional de Enxeñeiros en Informática de Galicia. “Temos capacidade técnica e tamén académica, e estanse a dar os pasos tamén dende o institucional para fortalecer este sector”, explica, aínda que precisa que é necesario facer unha radiografía do estado da industria do videoxogo. “Podemos ser punteiros en España igual que o somos na industria audiovisual”. 

Un xogo ambicioso

Por iso, para o presidente do CPEIG, proxectos coma o de The Waylanders deben ser recoñecidos con premios coma este. “Dámosllo pola valentía de emprender este camiño, porque é un xogo ambicioso e porque fai patria facendo á vez algo diferencial”.  

En Gato Salvaje Studio, a poucas horas de recibir o galardón, seguen aínda inmersos en The Waylanders, pulindo detalles e pensando en expandir a franquía. “O que máis está a valorar o noso público é a dirección artística”, algo que se pode constatar vendo os vídeos de tasters e de críticos de videoxogos. “Iso mostra que temos un bo traballo, e do que podemos ofrecer un moi bo produto; non se pode mellorar algo que é malo”, asegura. 

Igual que fixeron co seu primeiro éxito, ARK La gran evasión (2015), gañador dos premios a Mellor Videoxogo Español e a Mellor Videoxogo do Ano que entrega o medio especializado Devuego, pensan sacar un spin-off de The Waylanders. A idea sobre a que traballan é explorar un formato distinto pero co mesmo Lore -termo da cultura gamer para falar dos universos creados-, porque sábense creadores dun mundo que aínda se pode explotar moito máis. Prieto fai a similitude cos contos e novelas da Saga de Geralt de Rivia, que aumentou o seu público coa adaptación en The Witcher, a serie de televisión. Un mundo creado por Andrzej Sapkowski que bebe da mitoloxía polaca e do que se están a facer xogos e videoxogos dende os anos 2000. 

Para o equipo de The Waylanders queda pendente, por agora, a dobraxe ao castelán e ao galego. “Entendíamos que se o videoxogo sucede en Galicia ten que poder desfrutarse en galego, e así o tiñamos pensado dende o comezo”, di Prieto. Pero tras un dos maiores proxectos galegos deste tipo, o estudio de videoxogos pensa afrontar os próximos anos en proxectos máis persoais, máis pequenos, pero co mesmo agarimo. 

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.