Equipo organizador da Technium Lan Party de Ourense.
Equipo organizador da Technium Lan Party de Ourense.

330 amantes da informática cítanse na Technium de Ourense

A Technium Lan Party 2016 abre este xoves as súas portas. Ata o domingo, a cita congregará no Pavillón de Deportes do campus de Ourense a arredor de 330 amantes da informática que compartirán catro días de diversión diante da pantalla dos seus ordenadores. Haberá tempo e ancho de banda suficientes para xogar en rede, para intercambiar arquivos e coñecementos e para desenvolver un amplo programa de actividades que terán como obxectivo último compartir a paixón polas novas tecnoloxías e os mundos virtuais.

Ourense Lan Party 2

“Esta será a cuarta edición da Technium Lan Party. Despois de tres anos, a súa organización, aínda que é complexa, xa está moi rodada polo que agardamos que de novo sexa un éxito”, explica Edgar Ruíz, en representación dos estudantes organizadores, a Asociación Sectorial de Estudantes de Enxeñaría Informática (ASEII). O número de postos habilitados nesta ocasión, apunta, son os que pode asumir o recinto, e esgotáronse como en anos anteriores. Cunha idade maioritaria situada entre os 18 e os 25 anos, sinala, o público que acode a esta cita é maioritariamente galego, aínda que vén xente de cidades como Cádiz ou Alacante. “O que xa temos é un público fiel que acode edición tras edición e iso é moi satisfactorio para nós porque significa que lles gusta a Technium e repiten”, recalca Edgar Ruíz.

Haberá torneos dos xogos en liña máis seguidos a nivel internacional

A cita, que conta coa colaboración Escola Superior de Enxeñaría Informática e da Vicerreitoría do Campus de Ourense, permite aos inscritos facer un uso continuado das súas instalacións, podendo quedar a durmir no Pavillón e podendo conectarse as 24 horas. Durante o día e durante a noite, os participantes poden empregar os seus equipos para os seus temas de interese pero tamén participar nun amplo abano de actividadades que buscan diversificar a programación. Deste xeito, haberá torneos de League of Legends e Counter-Strike: Global Offensive, dous dos xogos máis seguidos no ámbito internacional, e de FIFA 2016,Super Smash Bros. Wii U e Hearthstone.

Á hora de elixir os torneos, apuntan desde a organización, tiveron en conta o feito de que os “e-sports” son un xénero que está cobrando cada día máis representación mediática. “Cremos que é enriquecedor fortalecer a promoción de eventos dedicados a eles e recompensar aos seus usuarios nun ambiente de competitividade que, desde fai anos, leva xerando novas amizades e bonitos recordos a todos os participantes na nosa Lan Party”, comentan desde a organización. Polo que se refire aos concurso, haberaos de lanzamento de CD, de programación e de creación de pezas de “hama beads“. Tamén terá lugar unha charla de comunicación por radio que lles permitirá ás persoas interesadas adentrarse no mundo da radioafición.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.