A empresa Beta Implants, de Salvaterra do Miño, nacido ao abeiro da terceira aceleración de ViaGalicia, recibiu o galardón que entrega por primeira vez a aceleradora que impulsan o consorcio da Zona Franca de Vigo e a Axencia Galega de Innovación da Xunta de Galicia. Beta Implants está dedicada ao deseño e produción a medida de implantes, próteses e biomateriais para animais.
A directora xeral da empresa, Bibiana Rodiño, recibiu o galardón, dotado con 150.000 euros de financiamento procedentes de XesGalicia e Vigo Activo, de mans do delegado de Estado na Zona Franca de Vigo, David Regades, e a directora de GAIN, Patricia Argerey.
O comité técnico que seleccionou a Beta Implants entre máis de medio cento de proxectos presentados, recoñeceu a evolución do modelo de negocio da empresa, baseado no I+D+i, desde a súa participación en ViaGalicia, a súa consolidación no mercado, o valor engadido e a innovación que achega ao sector, ademais da creación de emprego de calidade, cualificado e indefinido.
Durante o acto de entrega, celebrado a pasada semana na sede da Zona Franca en Nigrán, David Regades subliñou que “Beta Implants é o exemplo perfecto de empresa produtiva que ViaGalicia quere seguir apoiando: proxectos innovadores, capaces de crear emprego para Galicia e de manterse no tempo a través de modelos de negocio sólidos”.
Pola súa banda, Patricia Argerey remarcou a proposta innovadora da empresa gañadora, así como as do resto de empresas participantes na última edición de ViaGalicia, a quinta, xa que “contribúen a mellorar a calidade de vida da cidadanía galega”.
Investors Day
A entrega do premio a Beta Implants celebrouse no marco do Investors Day, unha xornada na que os proxectos que terminan agora a súa fase de aceleración en ViaGalicia se encontraron cun cento de inversores para coñecer as oportunidades de negocio e investimento ás que se poden adscribir.
O encontro deu a oportunidade ás start-ups para captar novos socios a través de presentacións breves e áxiles, explicando os mercados aos que se dirixen ou os seus plans de crecemento, que foron debullados polos inversores para aclarar posibles dúbidas.
Nestes cinco anos, ViaGalicia facilitou a creación de máis de 60 empresas, das cales o 80% seguen activas, xerando máis de 240 novos empregos cualificados (o 83% indefinidos) e cinco millóns de euros de facturación, captando 19 millóns de euros de financiamento.
