O Sergas vacinará a 15.000 nenos cunha dose máis eficaz contra a bacteria da meninxite

Sanidade decide incrementar a inmunización dos meniños de dous anos xa vacinados cunha protección catro veces maior

A Xunta iniciará este mes de maio a recaptación de 14.850 nenas e nenos nacidos en 2022 para seren protexidos fronte á enfermidade pneumocócica invasora (onde se inclúe a meninxite) coa vacina 20-valente que recentemente foi autorizada para menores de idade e incluída pola Consellería de Sanidade no calendario galego de vacinación. 

Así se desprende do informe da abordaxe da prevención das meninxites bacterianas inmunoprevibles en Galicia que foi abordado hoxe polo Consello da Xunta.

Publicidade

Deste xeito, bebés nados en 2022 aos que se puxo no seu momento a vacina 13-valente fronte ao pneumococo, recibirán agora unha dose da inmunización 20-valente que inclúe serotipos adicionais. 

O obxectivo da abordaxe da Dirección Xeral de Saúde Pública é aumentar a protección directa de nenas e nenos fronte á enfermidade polos serotipos adicionais incluídos nesta nova vacina e, de forma indirecta, para a poboación non vacinada, dado que os bebés son altos transmisores. 

A importancia da protección desta franxa de idade está avalada polo seguimento epidemiolóxico en materia de saúde pública que constata que, no período 2019 a 2023, o maior número de casos de enfermidade pneumocócica invasora, en poboación pediátrica, se produciu en menores dun ano e, a continuación, dos de 1 e 2 anos de idade. Concretamente no ano 2023 a incidencia no grupo de menores de 2 anos foi de 3,4 casos por 100.000 habitantes. 

Esta campaña especial, que finalizará o 31 de decembro, desenvolverase nos puntos de vacinación habituais. O valor aproximado destas vacinas ascende a 673.000 euros, polo que a achega da Consellería de Sanidade nas vacinas que protexen fronte á meninxite supera os once millóns de euros. Con todo, o investimento completo da Xunta no Programa Galego de Vacinación supón preto dos 40 millóns de euros e mantén a Galicia co calendario de inmunización universal e gratuíto máis completo do mundo.

Cobertura pioneira fronte ao meningococco e pneumococo

Galicia situouse á vangarda á hora de introducir no calendario de inmunización ao longo de toda a vida todas as novidades terapéuticas fronte ao pneumococo e ao meningococco.

Na actualidade, adminístrase a vacina antipneumocócica 20-valente a grupos de risco, a todas as persoas cando chegan aos 65 anos e, desde o 15 de abril, a Xunta substituíu a 13-valente por esta vacina con maior cobertura tamén no caso de menores de idade. 

Estímase que a vacina 20-valente pode chegar a proporcionar unha protección catro veces maior que a 13-valente, tendo en conta os serotipos que circulan na nosa comunidade. Segundo os datos de vixilancia epidemiolóxica da Consellería de Sanidade, o 60% dos casos de enfermidade pneumocócica invasiva, incluídas as formas máis graves como a sepse e a meninxite, son debidos a serotipos que están presentes na nova vacina. 

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Sanidade intensifica a vixilancia da tosferina, con 241 casos no que vai de ano

A maior concentración de diagnósticos actuais dáse en idades escolares, sobre todo na franxa de 10-14 anos

O Sergas inicia un programa piloto de cribado de cancro de pulmón

A proba vai dirixida a persoas de alto risco de entre 55 e 74 anos que sexan grandes fumadoras ou deixaran o hábito hai menos de 10 anos

Os pediatras aconsellan vacinar as embarazadas para evitar casos graves de tosferina

A inmunización das nais xestantes proporciona unha elevada protección aos bebés ata que reciben a súa primeira dose aos dous meses de idade

África González, ante a reaparición do sarampelo: “As familias deben vacinar os seus fillos”

España rexistra os seus primeiros casos trala pandemia e dende o 1 de xaneiro suma xa 15 contaxios