Científicos de Vigo demostran que un compoñente da uva ‘frea’ o melanoma

O resveratrol (RSV), un composto de orixe vexetal que acada a súa maior concentración na pel da uva negra e en froitos vermellos como o amorodo, o arando ou a amora, inhibe a proliferación de células de melanoma modulando o ciclo celular. Esta é unha das conclusións do artigo Resveratrol inhibits the proliferation of melanoma cells by modulating cell cycle publicado polo International Journal of Food Sciences and Nutrition e en cuxa elaboración participaron os investigadores da universidade de Vigo, Maurizio Battino, Emilio Gil e Tamara Y. Forbes.

Por agora “non hai ningunha evidencia de que o consumo de resveratrol poida ser efectivo no tratamento do melanoma”, aclara Maurizio Battino

O estudo internacional demostrou que o RSV inhibe fortemente a proliferación de células de melanoma A375, ao diminuír a viabilidade celular, promover a apoptose e deter o ciclo celular; uns efectos, nos que o factor duración do tratamento de resveratrol é comparativamente máis importante que o factor concentración do composto mesmo.

Publicidade

“Nun principio o artigo era máis amplo e trataba de dúas liñas celulares: A375 e A431, pero os datos eran moitos e podían xerar un pouco de confusión, polo que os avaliadores nos pediron separar o contido e centrarnos só nas A375”, explica Maurizio Battino, director do Grupo de Nutrición e Ciencia Alimentaria NF1 da Universidade de Vigo, que aínda que con anterioridade a este estudo xa traballara co RSV, nunca o tivo no centro da súa atención e investigación, dedicando máis interese a outros compostos bioactivos. Na investigación tamén participaron científicos da Politecnica delle Marche (Italia) e da Guangdong Medical University, onde se localiza un dos centros de estudo sobre melanomas máis importantes de China.

Estudos previos

En relación ao posible tratamento en vivo e en pacientes, o investigador italiano indica que aínda é cedo para plantearse unha aplicación directa. “Trátase de estudos previos para descubrir cales son os mecanismos efectivos que poden afectar á proliferación tumoral para, nun futuro, desenvolver estratexias (por exemplo, fármacos con características similares)”, explica Battino, que asegura, que de momento, non hai ningunha evidencia de que o consumo de resveratrol, en calquera forma, sexan pastillas ou comendo os alimentos, como a uva, que conteñen este composto, poida ser efectivo no tratamento do melanoma.

Hui-Zhi Yang, Jiaojiao Zhang, Jie Zeng, Shengbo Liu, Fei Zhou, Fang Zhang, Francesca Giampieri, Danila Cianciosi, Tamara Y. Forbes, Johura Ansary, Emilio Gil e Rong Yi Chen, son xunto a Maurizo Battino as autoras e autores do artigo publicado no International Journal of Food and Sciences and Nutrition.” É o primeiro traballo que facemos sobre o resveratrol (RSV) e a gran primeira colaboración coa Guangdong Medical University e esperamos que sexa a base para máis estudos e o desenvolvemento de colaboracións moi proveitosas”, explica Maurizio Battino.

Referencia: Resveratrol inhibits the proliferation of melanoma cells by modulating cell cycle (Publicado en International Journal of Food Sciences and Nutrition).