Venres 29 Marzo 2024

“Vai evitar sufrimento, morte e enfermidade”: os motivos para o optimismo co novo Paxlovid

O tratamento oral contra a covid autorizado por Bruxelas reduce un 89% as hospitalizacións e provoca unha caída importante da mortalidade

Bruxelas reforzou este venres o seu sistema de defensa contra o coronavirus aprobando o uso do primeiro antiviral oral para tratar a covid-19 na Unión Europea. A decisión do executivo non se fixo esperar despois de que a Axencia Europea dos Medicamentos, recomendase, só unhas horas antes, a autorización de comercialización condicional do fármaco Paxlovid, da compañía farmacéutica Pfizer, “para os adultos que non necesitan osíxeno suplementario e aqueles que teñen un maior risco de que a enfermidade se agrave”, precisa a EMA no seu comunicado.

Para Juan Gestal, profesor emérito de Saúde Pública da USC, trátase dunha noticia importante por ser o primeiro tratamento oral, en pastillas, do que se dispón e porque se pode administrar ambulatoriamente. “Seguramente, nun primeiro momento, vai a haber pouca cantidade e terá que facerse unha selección dos pacientes que o poden recibir. A Axencia Española de Medicamentos e Produtos Sanitarios xa está traballando neste asunto e pénsase que as persoas seleccionadas poderían ser aquelas que están recibindo ou recibiron fai pouco tratamentos inmunodepresores ou as que teñan enfermidades que provoquen inmunodepresión. Tamén se fala de facer como Francia, onde se inclúe como prioritarios os maiores de 65 anos que teñan factores de risco como a obesidade, deficiencias respiratorias, insuficiencia cardíaca, renal crónica ou hipertensión arterial”, explica.

Publicidade

Menos hospitalizacións e mortes

O Paxlovid, que xa se administra noutros países como Estados Unidos, contén dúas sustancias activas en dous comprimidos diferentes, a PF-07321332 e o coñecido antiviral ritonavir. A primeira reduce a capacidade do SARS-CoV-2 de multiplicarse no noso organismo e o ritonavir axuda a que o primeiro medicamento se manteña máis tempo activo no noso corpo.

Juan Gestal: “Co novo medicamento agárdase que o virus pase a ser endémico, un coronavirus máis de outono-inverno”

A EMA recomendou a autorización do fármaco de Pfizer despois de que o seu Comité de Medicamentos de Uso Humano concluíse que as probas realizadas con enfermos da covid tratados co antiviral mostraban unha redución moi significativa, de ata un 89%, nas hospitalizacións e unha caída importante no número de mortes. As probas foron realizadas con pacientes con risco de que a enfermidade se agravase.

“Coa chegada deste medicamento agárdase que o virus deixe de circular como ata hoxe, finalmente, e pase de ser un virus pandémico, que pasemos da situación actual pandémica, a ser un virus endémico. Podería converterse nun coronavirus máis de outono-inverno que pode esixir nun primeiro momento unha vacinación anual como ocorre coa gripe”, asegura o profesor universitario.

As incertezas do fármaco

A Axencia Europea dos Medicamentos explica na súa recomendación que o perfil de seguridade deste fármaco é “favorable e que os efectos secundarios foron, xeralmente, leves”. A EMA tamén fai unha advertencia sobre o feito de que o antiviral ritonavir é coñecido pola súa interacción con outros medicamentos que toda a información necesaria será posta en coñecemento dos responsables sanitarios. “Os beneficios do medicamentos son maiores que os seus riscos”, conclúe.

Outra das incertezas sobre este antiviral é se responderá da mesma maneira ante diferentes variantes xa que, no momento de realizar os estudos, os pacientes enfermos de covid que participaron estaban contaxiados pola delta. Segundo os análises de laboratorio que se están levando a cabo, a EMA asegura no seu comunicado que os resultados coa variante ómicron poderían ser similares.

España é un dos países europeos que decidiu adquirir xa varios centos de miles das pastillas de Pfizer, algo máis de 340.000 segundo anunciou o Goberno, pero “se os procedementos para que o antiviral chegue finalmente aos pacientes son normalmente rápidos, afirma Gestal, a cuestión é que a compañía farmacéutica entregue esas doses. Supoño que irán servindo paulatinamente”.

Todas as miradas postas no novo antiviral

Malia as preguntas que aínda se teñen sobre o medicamento, as expectativas que esperta o Paxlovid son enormes entre a poboación, as autoridades e a comunidade científica. No seu anuncio nas redes sociais da aprobación para o seu uso nos Estados membro, a comisaria europea para a Saúde, Stella Kyriakides, cualificaba este venres o novo antiviral como “a segunda liña de defensa ante a covid”.

Algo co que concorda, optimista, Juan Gestal, para quen por unha banda, vaise poder evitar sufrimento, enfermidade e mortes. “Por iso vai a ser moi importante este fármaco, para protexer a poboación. Isto súmase ademais ás vacinas e á inmunidade despois da variante ómicron que está infectando a moitísimas persoas. Creo que todos estes elementos poden ser determinantes de cara ao fin da pandemia na chegada da primavera”.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Por que algúns pacientes teñen covid persistente e outros non? Este estudo dá na clave

Un equipo do Hospital Universitario de Zúrich busca mellorar a atención aos doentes con novas estratexias de tratamento

Ascenden a 57 os falecidos por gripe en Galicia

O último informe do Sergas confirma a tendencia á baixa da incidencia nas catro provincias

Por que aumentan as infeccións respiratorias agudas en España?

Estamos xusto no momento do incremento da curva da gripe que este ano coincidiu co Nadal e o aumento dos contactos sociais

Tes gripe ou covid? Estas son as diferenzas

A inmunóloga África González admite que teñen síntomas moi similares pero que se distinguen polo tempo de incubación e a estacionalidade