A ‘vacina galega’ avanza ante as incertezas da ómicron

A EMA dá luz verde ao soro de Novavax, que se producirá no Porriño, aínda que advirte dos "datos limitados" fronte a outras variantes

A EMA aproba a vacina de Novavax.
A EMA aproba a vacina de Novavax.

O Porriño. Alí está a sede de Biofabri, filial do grupo biofarmacéutico Zendal. O lugar no que se producirá o antíxeno dunha nova vacina contra a Covid-19 da empresa estadounidense Novavax, todo grazas a un acordo asinado entre as dúas empresas. A súa alianza está máis de actualidade ca nunca. A Axencia Europea do Medicamento (EMA) determinou este luns que a vacina é “segura e eficaz”. Polo tanto, a institución recomenda autorizar a súa licencia converténdose, así, no quinto soro contra o coronavirus en superar o filtro científico europeo.

Malia o respaldo da EMA, o escenario da pandemia está cambiando con rapidez. Segundo explica á Agencia SINC a viróloga Sonia Zúñiga, a vacina de Novavax “é segura e eficaz en previr síntomas causados polas variantes circulantes no momento do ensaio (fundamentalmente alfa e beta)”. De igual maneira, a EMA subliñou que “existen datos limitados sobre a eficacia de Nuvaxovid (nome comercial da vacina) fronte a outras variantes, incluída ómicron”.

Dúas doses sen ultrafrío

Polo de pronto, xa se acendeu a luz verde desta nova vacina, que está aconsellada para maiores de 18 anos. De igual maneira ca outros soros, como o de Pfizer ou Moderna, deben administrarse dúas doses. Iso si, con 21 días de diferenza entre a primeira e a segunda. Segundo Zúñiga, unha das vantaxes que prensenta esta vacina en relación ás outras que xa hai no mercado é que non precisa ultrafrío, polo que se pode distribuír con máis facilidade a outros lugares do mundo onde é difícil que cheguen certas vacinas.

Polo tanto, o pronunciamento da EMA a través do Comité de Medicamentos de Uso Humano (CHMP) respaldou por consenso que os datos dispoñibles sobre a vacina son “sólidos e cumprían cos criterios da Unión Europea en canto a eficacia, seguridade e calidade“. Para chegar a esta conclusión, o CHMP analizou os datos de dous ensaios clínicos que involucraron a máis de 45.000 persoas. O primeiro, que se realizou en México e Estados Unidos, houbo unha redución do 90,4% no número de casos de sintomáticos dende sete días despois da segunda dose.

Proteínas recombinantes

O segundo dos estudos, levado a cabo en Reino Unido, observouse unha diminución similar en pacientes sintomáticos que recibiron a vacina, o que situou a eficacia nun 89,7%. A EMA, a este respecto, di o seguinte: “En conxunto, os resultados dos dous estudos mostran unha eficacia da vacina para Nuvaxovid de arredor do 90%”. En relación aos efectos secundarios máis comúns, foron “leves ou moderados” e incluíron sensibilidade e dor no lugar da infección, dor muscular, de cabeza e nas articulacións, malestar xeral e náuseas ou vómitos.

Finalmente, esta vacina baséase nunha forma estabilizada da proteína S (Spike, en inglés). Para iso empregouse unha tecnoloxía de nanopartículas de proteína recombinante. De feito, é a primeira vacina baseada en proteínas que recomenda a EMA contra a Covid-19. De todos os xeitos, e tal como sinala Zúñiga a SINC, este tipo de tecnoloxía úsase en moitos outros soros, como por exemplo o da gripe.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.