Martes 27 Febreiro 2024

Unha nova molécula mellora o tratamento do cancro de mama

Un grupo de investigación da Universidade de Santiago, en colaboración con científicos das Universidades da Coruña e Vigo, o Instituto de Investigación Biomédica Ourense-Pontevedra-Vigo, o Sergas e o Hospital de Jove en Xixón, descubriron un novo tratamento contra o cancro de mama baseado na combinación de novos análogos de vitamina D con quimioterapia. Este grupo formado por químicos, biólogos e médicos está moi esperanzado en poder desenvolver como fármaco o produto xa que podería ser de especial interese no tratamento de desordes hiperproliferativos como o cancro ou a psoriase.
Os resultados do traballo Pit-1 inhibits BRCA1 and sensitizes human breast tumors to cisplatin and vitamin D treatment  acaban de ser publicados na revista estadounidense especializada en cancro OncotargetNel, os investigadores describen que a combinación de novos análogos de vitamina D coa quimioterapia utilizada de forma habitual no tratamento do cancro de mama máis agresivo é máis efectiva que a administración de quimioterapia de forma illada. O traballo está asinado polos seguintes investigadores: Samuel Seoane, Efigenia Arias, Rita Sigueiro, Juan Sendón-Lago, Anxo Martínez-Ordóñez, Esteban Castelao, Noemí Eiró, Tomás García-Caballero, Manuel Macía, Rafael López-López, Miguel Maestro, Francisco Vizoso, Antonio Mouriño e Román Pérez-Fernández.

Os investigadores contactan con famacéuticas interesadas no fármaco

Os autores demostran que a administración combinada de análogos de vitamina D e cisplatino actúa sinerxicamente, inhibindo a proliferación celular, estimulando a apoptose (morte celular programada), aumentando o dano no ADN e reducindo o crecemento tumoral, tanto en liñas celulares de cancro de mama en ratos como en células illadas de tumores de pacientes con esa enfermidade.
Aínda que esta combinación foi xa utilizada previamente, neste caso faise cunha molécula deseñada polo grupo de Química Orgánica da USC dirixido polo profesor Antonio Mouriño, experto en síntese de análogos de vitamina D. Esta molécula posúe unha serie de modificacións na súa estrutura que fan que manteña as propiedades da vitamina D sintetizada no organismo pero evita efectos secundarios como o incremento de calcio en sangue, que a doses elevadas pode resultar tóxico. As súas propiedades fan que o novo composto sexa ademais potencialmente adecuado para outras patoloxías, como por exemplo a psoriase.
Este novo análogo de vitamina D está protexido a través dunha patente propiedade das universidades de Santiago de Compostela e A Coruña e do Sergas. Tanto Samuel Seoane, Efigenia Arias, Antonio Mouriño e Roman Perez-Fernandez (USC), como Miguel Maestro (Universidade da Coruña) e Esteban Castelao (Instituto de Investigación Biomédica Ourense-Pontevedra-Vigo), todos autores, están xa en contacto con empresas farmacéuticas interesadas no seu desenvolvemento como fármaco para o seu futuro uso en pacientes.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un novo test de saliva detecta o cancro de mama en só cinco segundos

Un equipo internacional identifica os tumores de maneira máis rápida, barata e precisa que os sistemas tradicionais

A toxoplasmose é un factor de risco para o envellecemento inflamatorio nos maiores

Un estudo da UDC demostra que as persoas cunha resposta de anticorpos máis forte á infección tiñan máis probabilidades de ser fráxiles

Funcionan os novos fármacos para deixar de fumar? “Se non cambias a conduta, a posibilidade de recaída é alta”

Mónica Pérez Ríos, investigadora da USC, explica que estes medicamentos teñen unha pauta de consumo de 25 días

Demostrada a eficacia dun novo fármaco contra o cancro de colon

Os investigadores desenvolveron un medicamento dirixido contra a proteína CD98hc, unha nova diana terapéutica presente na superficie das células tumorais