Unha análise de sangue alerta do cancro catro anos antes

Anticiparse é clave ante o cancro. Cando se detecta en etapas temperás, nove de cada dez persoas superan a doenza. Pero, se a diagnose chega nun momento avanzado, a estatística baixa claramente ata unha persoa de cada catro. Así que moitos equipos científicos ao longo do mundo están na carreira por detectar o cancro coa maior anticipación posible.

E chegan boas novas. Porque a revista Nature Communications publicou este martes o desenvolvemento dun test sanguíneo non invasivo que podería utilizarse para a detección en fase inicial de cinco tipos comúns de cancro –estómago, esófago, colorrectal, pulmón ou fígado– e ata catro anos antes do diagnóstico convencional.

Publicidade

O novo estudo está liderado por expertos da Universidade de California en San Diego (Estados Unidos), e describe unha proba de detección do cancro no sangue – PanSeer– que examina as firmas de metilación específicas do tumor.

Os autores, con Kun Zhang á cabeza, realizaron unha análise de mostras de plasma obtidas de 605 individuos asintomáticos, 191 dos cales foron diagnosticados posteriormente con cancro. Ademais, fixeron un perfil das mostras doutros 223 pacientes de cancro diagnosticados, así como de 200 mostras de tumores primarios e de tecidos normais.

Segundo a investigación, a proba pode detectar con alta especificidade cinco tipos comúns de cancro (estómago, esófago, colorrectal, pulmón ou fígado) en pacientes que xa foran diagnosticados, así como en individuos asintomáticos ata catro anos antes do diagnóstico convencional.

“A principal novidade deste traballo reside na demostración de como os sinais do cancro no sangue poden ser detectadas de 1 a 4 anos antes de que eses pacientes sexan diagnosticados por primeira vez nos hospitais”, explicou á axencia SINC o doutor Zhang.

Limitacións da proba

Os autores quixeron deixar claro as limitacións deste estudo: “É pouco probable que o ensaio PanSeer prognostique aos pacientes que desenvolverán cancro no futuro. En cambio, o máis probable é que identifique a aqueles que xa teñen crecemento tumoral pero que continúan asintomáticos polos métodos de detección actuais”.

Por iso, insisten na necesidade de máis estudos lonxitudinais a gran escala para confirmar o potencial da proba na detección precoz do cancro. “Probas de detección temperá como esta aumentarían enormemente a taxa de éxito na curación do cancro nas primeiras etapas a través da extirpación cirúrxica dos tumores”, conclúe Zhang.

Aquí podes consultar o estudo publicado en Nature Communications