Un estudo publicado recentemente na revista Frontiers in Psychiatry vén de demostrar que o consumo de substancias é un factor de risco de suicidio. Así o conclúe un equipo multidisplinar, despois de analizar unha serie de datos sobre as catro provincias de Galicia entre os anos 2006 e 2020. A investigación forma parte dun proxecto no que participan os investigadores Gerardo Flórez, da Unidade de Tratamento de Adiccións do Hospital de Ourense, e Teresa Seoane Pillado, da Área de Medicina Preventiva e Saúde Pública do Instituto de Investigación Biomédica da Coruña (INIBIC). No estudo tamén colaborou persoal do Plan Nacional sobre Drogas e varios psiquiatras con experiencia no campo a estudo.
O suicidio é a primeira causa de morte en persoas con trastorno por uso de substancias. O risco de morte por suicidio en persoas que consomen alcol é 10 veces maior que entre a poboación xeral e 14 máis no caso doutras substancias psicoactivas. Os profesionais destacan, de maneira especial, o papel do alcol, non só como factor de risco senón como factor precipitador da conduta pola súa función desinhibidora e a afectación executiva que produce a intoxicación.
O estudo desvelou que o suicidio consumado prevalece máis en zonas rurais e que se comete máis entre home que entre mulleres. A explicación reside en que estas persoas non adoitan buscar axuda nos profesionais da saúde para afrontar problemas mentais e o estrés. Seguramente por estes motivos, Lugo é a provincia con maior taxa de suicidio das catro galegas.
“Necesítase prevención e estratexias de tratamento”, explica Gerardo Flórez nun comunicado da Sociedade Científica Española de Estudos sobre o Alcol, o Alcolismo e outras Toxicomanías. “A prevención universal pode ser útil para reducir os consumos entre a poboación xeral e por tanto a incidencia dos trastornos por uso de substancias”, argumenta. “Como puidemos ver, a intoxicación por consumo de alcol e/ou outras drogas pode precipitar a conduta suicida, polo que intervir na prevención dos consumos, pode reducir tamén as taxas de suicidio”, conclúe o experto.
Ademais, tras a análise socioeconómica e tras a influencia da crise do 2008, as taxas de suicidio non foron significativamente maiores, como se podía crer en principio, senón que tivo un efecto menor. Hai, por tanto, outras cuestións que inflúen moito máis, como é o consumo de substancias. Os autores conclúen que reducir as taxas de consumo, axudaría a reducir as taxas de mortes por suicidio en Galicia, segundo o observado nese estudo durante ese período de tempo.
Referencia: Suicide deaths and substance use in the Galician provinces between 2006 and 2020 (Publicado en Frontiers in Pshychiatry)
