A psoríase afecta a decenas de miles de persoas en Galicia.
A psoríase afecta a decenas de miles de persoas en Galicia.

Unha tese do CiMUS avanza na terapia contra a psoríase

A investigadora Elia Álvarez desenvolveu un estudo sobre unha interleuquina validada como diana terapéutica para abordar esta doenza

Calcúlase, segundo algunhas enquisas, que máis de 50.000 persoas en Galicia teñen psoríase, unha doenza autoinmune que provoca lesións na pel e cuxa orixe aínda non está de todo clara, xa que se observa unha certa predisposición xenética mais non é hereditaria, pois nela inflúen tamén outros factores desencadeantes. Contra ela existen algúns tratamentos que poden mitigar as lesións, mais non hai ata o momento unha cura efectiva. É, por tanto, unha doenza na que están centrados bastantes esforzos desde a ciencia. Desde o CiMUS de Santiago acaba de presentarse un avance na terapia contra a psoríase grazas á tese de doutoramento de Elia Álvarez Coiradas, cuxo traballo “supón un salto cualitativo na investigación de tratamentos efectivos contra a psoriase a través dunha metodoloxía de descubrimento temperán de fármacos”. O traballo estivo dirixido por Eduardo Domínguez e Mabel Louza, do grupo BioFarma.

Como explica Álvarez Coiradas, “a interleuquina 17 (IL-17) é unha citoquina proinflamatoria validada como diana terapéutica para o tratamento da psoríase mediante o uso de anticorpos terapéuticos que neutralizan esta citoquina ou o seu receptor. O uso destes medicamentos biolóxicos non está exento de limitacións, por exemplo o seu elevado custo ou a necesidade de utilizar unha vía de administración parenteral”.

Por iso, como se abordou nesta tese, é necesario desenvolver novos métodos que permitan descubrir ligandos de baixo peso molecular que bloqueen a interacción entre IL-17A e o seu receptor, a IL-17 RA. Con este obxectivo, Elia Álvarez abordou o uso dunha metodoloxía de descubrimento temperán de fármacos na que se xerou unha quimioteca focalizada e priorizáronse os ligandos identificados ‘in silico’ mediante ensaios biofísicos de unión a IL-17A/ IL-17 RA.

Así, atopáronse dous ligandos con eficacia antiinflamatoria na liberación de quimioquinas mediada por IL-17A en queratinocitos humanos. Estes bloquearon parcialmente a sinalización intracelular de IL-17 RA. Deste xeito, “os novos ligandos identificados poderían ser moduladores da resposta inmunitaria mediada por IL-17, alterada en patoloxías inflamatorias con compoñente autoinmune como é a psoriase”, engade a investigadora do CiMUS.

Presentación telemática da tese de Elia Álvarez. Foto: CiMUS.
Presentación telemática da tese de Elia Álvarez. Foto: CiMUS.

Elia Álvarez desenvolveu a súa tese cun contrato predoutoral FPU (Formación de Profesorado Universitario) do Ministerio de Ciencia, Innovación e Universidades. Ademais, outorgóuselle unha Axuda á mobilidade para estancias breves para beneficiarios do programa de Formación do Profesorado Universitario (FPU), coa que realizou unha estancia de investigación durante tres meses no laboratorio de Kilian Huber, no Nuffield Department of Medicine da Universidade de Oxford, no Reino Unido. E como resultado do traballo de investigación desta tese doutoral publicouse un artigo na revista International Immunopharmacology.

A investigación, co título “Identificación de novos ligandos dirixidos á interleuquina 17 con utilidade farmacolóxica en enfermidades autoinmunes”. foi avaliada polo tribunal composto por María Teresa de los Frades Alvaro (Universidade Francisco de Vitoria, de Madrid), Bruno Conti (Scripps Research, California, USA) e David Moreira Álvarez (Universidade de Santiago de Compostela).


Referencia: Discovery of novel immunopharmacological ligands targeting the IL-17 inflammatory pathway (Publicado na revista International Immunopharmacology).

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.