A convocatoria estatal da Acción Estratéxica en Saúde 2020, que convoca o Instituto de Saúde Carlos III (ISCIII), achegará ao sistema sanitario de Galicia un total de 1.878.522 euros cos que se poderá financiar a contratación de 21 profesionais de diferentes áreas e recoñecida traxectoria no eido da investigación, segundo informou a Xunta de Galicia este mércores.
A liña de financiamento, que ten por obxecto a concesión de subvencións dirixida ao financiamento de unidades vinculadas ás Plataformas ISCIII de apoio á I+D+i en Biomedicina e Ciencias da Saúde, fará posible que as fundacións que xestionan a investigación sanitaria en Galicia dispoñan de novo persoal: o Instituto de Investigación Sanitaria de Santiago de Compostela (IDIS) contará cun total de 15 novos contratos, o Instituto de Investigación Biomédica da Coruña (Inibic) poderá realizar 4 contratos, o Instituto de Investigación Biomédica Galicia Sur contará con 1 contrato e a Fundación Pública galega de Medicina Xenómica tamén con 1 contrato.
Pola súa parte, nunha nota de prensa, o IDIS de Santiago destacou que o financiamento recibido supón un incremento do 36,6% no número de investigadores respecto ao ano anterior, cunha porcentaxe de éxito superior ao 50% nas solicitudes realizadas, representando un 70% do total en Galicia.
O organismo baseado en Compostela é o maior centro de investigación sanitaria do país, con máis de 1.200 profesionais integrados en case 94 grupos que abranguen disciplinas como a endocrinoloxía, as neurociencias, plataformas e metodoloxía e a inflamación. Segundo o director científico do IDIS, José Castillo, o centro márcase un horizonte competitivo cara ao ano 2025, no que se marcarán “unha serie de obxectivos estratéxicos que pasan, fundamentalmente, por manter o incremento de todos os indicadores de actividade, estabilizar o talento dos investigadores e o persoal técnico e estar máis preto da sociedade”.
Neste sentido, di Castillo, “os nosos grupos de influencia e o conxunto da sociedade deben percibir a importancia do traballo de investigación e o noso papel de enlace coa industria e a medicina asistencial, ese é o camiño da excelencia”. Entre os desafíos, o investigador tamén expón a necesidade de “facer máis efectiva a integración da área sanitaria de Lugo, con máis infraestruturas e colaboracións con centros de referencia e incrementar espazos para favorecer o desenvolvemento de proxectos”.
