O Consello Europeo de Innovación (EIC), institución da Unión Europea que promove o desenvolvemento das tecnoloxías punteiras nos países membros, galardoou este xoves en Bruxelas ao Servizo Galego de Saúde nos I Premios Europeos á Contratación Pública de Innovación. O EIC recoñeceu o traballo da Administración autonómica na categoría de estratexia de adquisicións, na que se premian iniciativas a longo prazo que desencadean diferentes adquisicións de innovación, solucións e prácticas sostibles.
Estes galardóns teñen como obxectivo darlle visibilidade á importancia dunha estreita cooperación entre o comprador e o provedor para levar as solucións innovadoras ao mercado. O galardón obtido polo Sergas é un dos catro premios do Consello Europeo de Innovación 2021 que se celebran e que dan forma ao futuro da innovación en Europa, xunto co Premio da UE para Mulleres Innovadoras, os Premios Capital Europea da Innovación e o Concurso Europeo de Innovación Social.
https://twitter.com/EUeic/status/1463865858833453057
https://twitter.com/ACIS_sergas/status/1463845740074131472
Tal e como destaca o Sergas a contratación de innovación é estratéxica dentro das políticas da Unión Europea para modernizar o sector público con solucións de maior calidade e contribúen directamente á competitividade dos países, ao abrir unha ruta ao mercado para novos actores, especialmente as PEMEs. Tamén axudan ás empresas máis grandes a levar produtos innovadores ao mercado, estimulando o crecemento empresarial transfronteirizo e a creación de postos de traballo. A contratación de innovación tamén serve para abordar as necesidades sociais máis urxentes.
INNO-AHA
O EIC premiou a candidatura presentada polo Sergas a través da Axencia Galega de Coñecemento en Saúde (ACIS), que levaba por lema O camiño galego de innovación en busca da contratación pública de solucións innovadoras para un envellecemento activo e saudable (INNO-AHA, polo seu acrónimo en inglés).
A proposta amosa o traballo que desde 2012 desenvolven a Consellería de Sanidade e o Servizo Galego de Saúde pola compra pública innovadora con proxectos como Hospital2050 e Innovasaúde, Código100 e proxectos actualmente en marcha como Innova MicroLab, INNOVATRIAL ou LABSAÚDE −o primeiro living lab de saúde do Servizo Galego de Saúde no Hospital Universitario de Ourense−.
O Living Lab de Ourense, pioneiro dunha rede galega que testará terapias innovadoras
O proxecto INNO-AHA inclúe o recoñecemento de Galicia como unha das rexións de referencia europea no desenvolvemento, a adopción e escalado de prácticas innovadoras para un envellecemento activo e saudable (EIP on AHA Reference Site con 4 estrelas).
Para obter o galardón, a iniciativa do Sergas pasou por varias fases. Coñecéronse nun primeiro momento seis candidaturas finailistas
O proceso para a obtención do prestixioso premio constou de varias fases. En setembro, coñecéronse as 6 candidaturas finalistas: INNOSPRINT DIH (Francia); INNO-AHA SERGAS (España); NCBR-IS (Polonia); RESAH INNOVATION (Francia); Smartiago (do Concello de Santiago de Compostela); WBL PCP e PPI (Países Baixos). Pasou ao final, xunto ao Sergas, o proxecto polaco.
Ademais do recoñecemento do EIC, o Sergas, como gañador, unirase a un grupo de compradores pioneiros para mostrar a súa experimentación e promover experiencias de outros compradores, como, por exemplo, para aprender sobre novos enfoques a través do intercambio de boas prácticas, iniciativas, ideas e innovacións.
