O Servizo Galego de Saúde (Sergas), a través do seu boletín quincenal do Venres Epidemiolóxico (ver PDF), confirmou a existencia de dous novos casos de sarampelo que foran notificados polo Servizo de Medicina Preventiva do Hospital Comarcal de Monforte de Lemos o 16 de maio, tres semanas despois da detección doutro no Barco de Valdeorras. O vínculo entre ambos feitos leva á posibilidade de que se producise un pequeno brote da doenza en Galicia, á espera do seguimento das persoas que estiveron en contacto con estes afectados. Sería o primeiro desde 2011, cando un brote en Lugo xerou sete casos de sarampelo.
A persoa afectada en Monforte de Lemos, de 39 anos, presentou un exantema (erupción cutánea xeralizada ou extensa) nas extremidades e o tronco, con febre de 39ºC. Nove días despois dos primeiros síntomas, o 24 de maio, confirmouse por dous laboratorios distintos que a IgM (unha das respostas inmunitarias do corpo fronte ao sarampelo) era positiva.
Posible brote
A posibilidade de que se trate dun brote da doenza recae no “contacto estreito cunha persoa que presentou un cadro clínico semellante había 15 días” que tivera “IgM negativa e IgG positiva”, e cun “posible vínculo epidemiolóxico” co posible caso notificado en abril no Barco de Valdeorras. Un diagnóstico molecular confirmou a relación entre a doenza destas dúas persoas.
“Non hai motivos para preocuparse polo sarampelo en Galicia”
O Sergas expón que “en ningún dos casos hai constancia de vacinación fronte ao sarampelo”, unha inmunización que entrou a formar parte do calendario vacinal a comezos dos anos 80. Como parte do seguimento deste posible brote, os servizos médicos están seguindo “os contactos tanto laborais, familiares, como dos sanitarios que os atenderon, nos concellos do Carballiño; O Barco de Valdeorras; Chantada; Carballedo; A Barrela; e o Hospital de Monforte, que se manterá ata esta semana.
En caso de sospeita de sarampelo, con síntomas como febre superior a 38ºC, erupción xeralizada ou extensa e tose, catarreira ou conxuntivite, cómpre acudir canto antes a un centro médico.
