Boa parte dos concellos galegos nos que se manteñen vixentes os peches perimetrais verán como se relaxarán as restricións a partir da medianoite do xoves ao venres, segundo avanzou no serán do martes a Consellería de Sanidade. As novidades acordadas no comité clínico son varias:
- Paso ao nivel medio (ou ‘amarelo’) da área sanitaria de Ferrol, polo que se levantará o peche perimetral vixente sobre os 19 municipios do norte da provincia coruñesa. Iguálanse así iguálase ao nivel da meirande parte do territorio nas áreas de Lugo, Santiago, Ourense e Vigo.
- Só Soutomaior queda no nivel máximo (‘vermello’), con peche perimetral municipal, peche da hostalaría e limitación das reunións a persoas non conviventes, entre outras medidas.
- As áreas da Coruña e Pontevedra manteñen o seu peche perimetral, aínda que está permitida a mobilidade por todos os concellos de cada unha ao ficar todos en nivel alto (‘laranxa’).
- Outros 10 concellos (Cariño, Guitiriz, Lourenzá, A Pobra do Brollón, Tordoia, Porto do Son, Mos, Mondariz, Pazos de Borbén e Boborás) estarán no nivel laranxa, polo que só se permitirá a mobilidade con orixe e/ou destino nalgún deles.
- Os municipios de Corcubión, Curtis e Ponteceso pasan do nivel vermello ao laranxa, xa que se igualan coa situación da súa área.
- En Gomesende, A Gudiña, Moeche, A Peroxa e Toques pasan do nivel vermello ao amarelo.
- Os concellos de Arzúa, Dodro, Frades, Ordes, Rois, A Pontenova, Baralla, Guntín, Monforte de Lemos, Outeiro de Rei, Rábade, Sober, A Mezquita, A Merca, Bande, Beade, Celanova, Punxín, Sandiás, Taboadela, Verea, Viana do Bolo, Xunqueira de Espadanedo, Moaña, Oia e Redondela pasan do nivel laranxa a amarelo, ao igualarse á situación da súa área sanitaria.
Deste xeito, só 1 concello queda en nivel vermello. Un total de 69 (59 das áreas da Coruña e Pontevedra e os 10 mencionados) en nivel laranxa. O resto dos concellos de Galicia (243) quedan en nivel amarelo.
As medidas entrarán en vigor na medianoite do xoves 4 ao venres 5. Este mércores, o conselleiro de Sanidade, Julio García Comesaña, confirmou que o mapa de restricións se revisará tamén no subcomité clínico dos venres. Deste xeito, as posibles novas medidas decretadas ese día aplicaranse a partir do luns seguinte.
Así quedan, por agora, as restricións en Galicia:
E aquí podes buscar as medidas que rexerán a partir do venres no teu concello:
Esta decisión permitirá a todos os habitantes desta zona recuperar a mobilidade polo resto de municipios galegos en nivel medio a partir do venres á medianoite. As áreas da Coruña e Pontevedra ficarán na mesma situación.
Do mesmo xeito, reláxanse as restricións na meirande parte dos concellos sobre os que estaba vixente o peche perimetral. Só estará en nivel máximo o concello de Soutomaior. E no ‘nivel laranxa’ estarán os municipios de Cariño, Guitiriz, Lourenzá, Pobra de Brollón, Tordoia, Porto do Son, Mos, Mondariz, Pazos de Borbén e Boborás. Só estará permitida a mobilidade con orixe e destino entre eles.
O resto dos concellos galegos quedan en nivel medio.
