Cinco das sete áreas sanitarias de Galicia dispoñen deste xoves dun sistema para realizar probas de coronavirus a determinadas persoas sen baixar do coche, segundo informou o Sergas. As probas deberán ser autorizadas por prescrición facultativa e con cita previa, no marco dos criterios establecidos nos protocolos, e quedará rexistrada na historia clínica electrónica do paciente.
A medida, segundo informou a Xunta, trata de “complementar e axilizar o sistema de recollidas de mostras a domicilio, que ven incrementando a súa demanda nos últimos días”. Xa funciona en Vigo, Ourense e Lugo, comeza este venres na Coruña e Pontevedra, e o luns en Santiago e Ferrol.
O novo sistema, coordinado e priorizado polo servizo de Medicina Preventiva dos hospitais, permite axilizar tempos xa que posibilitan que os cidadáns se despracen en coche ao hospital, e ademais diminúe a utilización dos equipos de protección individual (EPI) xa que mentres cada visita a domicilio supón un cambio de EPI, os profesionais van utilizar un só equipo por quenda de traballo, sen necesidade de cambiarse con cada paciente.
