A revista Journal of Hepatology publicou esta semana unha investigación liderada polo laboratorio de Metabolismo Molecular do CiMUS da Universidade de Santiago de Compostela, que dirixe Rubén Nogueiras, na que se expón que os pacientes con obesidade e fígado graxo con inflamación presentan un maior risco tras a infección pola Covid-19.
O traballo aborda a problemática xa detectada por análises clínicas nas que se constatou que ata o 80% dos pacientes con forma grave de infección teñen obesidade, segundo un estudo Sociedade Española de Obesidade (SEEDO). Do mesmo xeito, tamén se observou que unha porcentaxe considerable de pacientes de coronavirus presentan algún tipo de fallo hepático.
Neste sentido, o equipo de Nogueiras aproveitou a súa relevante traxectoria no estudo da esteatohepatite non alcohólica ou fígado graxo con inflamación, unha doenza caracterizada por inflamación e fibrose hepática, asociada á obesidade e que afecta a 1.900 millóns de persoas no mundo. Así, o traballo aborda como podería influír esta patoloxía na infección causada polo SARS-CoV-2. E observouse que nos pacientes destas doenzas identifícase unha expresión máis elevada de ACE2, o receptor celular do virus, e de Tmprss2, unha molécula que facilita a unión das membranas do virus e a célula.
“Estes pacientes presentan, por tanto, unha maquinaria de entrada do virus moi eficaz, aumentando a súa vulnerabilidade en caso de infección”, expoñen Rubén Nogueiras e Malu Martínez Chantar, investigadora do CIC bioGUNE do País Vasco e tamén autora do artigo. No mesmo estudo identificouse que esta maquinaria de entrada do virus non está elevada en pacientes con obesidade e esteatose (un estadio máis leve que a esteatohepatite) nin en pacientes con obesidade e diabetes tipo 2, enfermidades que tamén están moi ligadas. O traballo tamén recolle, segundo destacan os autores, que se observaron expresións máis elevadas de ACE2 e TMPRSS2 no caso das mulleres con obesidade, o que podería causar predisposición a unha maior gravidade da Covid-19.
A investigación tivo como primeiros autores aos investigadores do CiMUS Marcos F. Fondevila, María Mercado-Gómez, Amaia Rodríguez e María J. González-Rellán, e desenvolveuse en colaboración co grupo de Javier Crespo, do Hospital Universitario Marqués de Valdecilla (IDIVAL) de Santander e do CIBEREHD, Gema Frühbeck, investigadora da Clínica Universidade de Navarra, o CIBEROBN e un consorcio de científicos de varios países.
Referencia: Obese patients with NASH have increased hepatic expression of SARS-CoV-2 critical entry points (Publicado en Journal of Hepatology).
